46 Teshkilat ortaq bayanat élan qilip, yawropa ittipaqini xitay bilen hemkarlashmasliqqa chaqirdi

Muxbirimiz irade
2022.03.31
Share on WhatsApp
Share on WhatsApp

1-April küni yawropa ittipaqi-xitay bashliqlar yighini ötküzülidighan bolup, sin arqiliq ötküzülidighan bu yighinda yawropa komissiyonining re'isi ursula won dér léyén we yawropa kéngishining re'isi charléz mishél, xitay re'isi shi jinping we xitay bash ministéri li kéchyang bilen körüshidiken.

Bu munasiwet bilen herqaysi döletlerde turushluq 46 Uyghur, xongkong, tibet we teywen teshkilatliri birlikte yawropa komissiyonining re'isi ursula won dér léyén we yawropa kéngishining re'isi charléz mishélgha birleshme mektub yollap, ulardin “Bu halqiliq peytte xitaygha qarshi qet'iy bolush” ni telep qilghan.

Ular mektubida munularni tekitligen: “Rusiye ukra'inagha hujum qilghan bir peytte, xitay teywen'ge dawamliq herbiy tehdit salmaqta. Xongkong, sherqiy türkistan we tibetttiki wehshiyliklirini dawamlashturmaqta. Hazir kishilik hoquqni dunya démokratiyesini janlandurushning bir yoli süpitide xitaygha qaratqan siyasetlerning merkizige qoyushning waqti keldi. Biz yawropa ittipaqining 1-apréldiki bashliqlar yighinida éniq, birlikke kelgen we qet'iy teleplerni otturigha qoyushini telep qilimiz. Hazir yawropa ittipaqi xitay bilen munasiwitini yaxshilaydighan peyt emes.”

Yuqiriqi 46 teshkilat ortaq bayanatida yawropa ittipaqi rehberliridin söhbet jeryanida “Rusiyening ukra'inagha qaratqan tajawuzini qollimasliq, teywen'ge tajawuz qilmasliq, sherqiy türkistandiki insaniyetke qarshi jinayitini, tibet we xongkongdiki zulumlirini ayaqlashturush heqqide xitayni keskin agahlandurush” ni telep qilghan. Bayanatta yene: “Kishilik hoquq we démokratiyening yawropa-xitay munasiwitining merkizi ikenlikini ispatlaydighan peyt keldi,” déyilgen.

Axirida, ular yawropa ittipaqining xitaygha iqtisadiy jehettin baghlinip qélishtek ehwalgha xatime bérish üchün zörür tedbirlerni qollinishqa chaqirghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.