Явропа иттипақи хитайға уйғур мәсилиси түпәйлидин җаза йүргүзгән

Мухбиримиз җәвлан
2021-03-22
Share

Ройтерс агентлиқиниң 22-март хәвәр қилишичә, явропа иттипақи хитайниң уйғурларға йүргүзгән кишилик һоқуқ дәпсәндичиликигә қарши һәрикәт қоллинип, 4 нәпәр хитай әмәлдариға җаза йүргүзгән, буниң ичидә бирси хитай дөләт хәвпсизлики идарисиниң юқири дәриҗилик башлиқи икән. Бу явропа иттипақиниң 1989-йилдин буян тунҗи қетим хитайни җазалиши һесаблинидикән.

Бу 4 әмәлдар уйғурларни кәң-көләмдә лагерларға солашниң актип иҗрачиси — уйғур аптоном районлуқ җ х идарисиниң башлиқи чен миңго, уйғур аптоном районлуқ парткомниң даимий һәйәт әзаси, сиясий-қанун комитетиниң секритари ваң миңшән, уйғур аптоном районлуқ парткомниң муавин секритари, биңтуән парткоминиң секритари ваң җүнҗең, уйғур аптоном районлуқ парткомниң сабиқ муавин секритари вә сиясий-қанун комитетиниң секритари җу хәйлун қатарлиқлар болуп, улар уйғур районида елип барған инсанийәткә қарши җинайәтлири билән җазалинип, явропадики мал-мүлки тоңлитилидикән вә явропаға саяһәт қилиши чәклинидикән.

Хәвәрдә билдүрүлүшичә, гәрчә бу җазалар символ характерлик болсиму, явропа иттипақиниң хитайға қаттиқ қол позитсийә тутидиғанлиқини ипадиләйдикән. явропа иттипақи узундин бери хитайни дост, содида һәмкарлашқучи дәп қарап кәлгән болуп, әмдиликтә хитайни кишилик һоқуқ вә әркинликни дәпсәндә қилғучи дөләт дәп қарашқа башлиған.

Явропа иттипақидики 29 дөләтниң һәммиси бу җаза тәдбиригә қошулған болуп, пәқәт венгирийә ташқий ишлар министирила бу тәдбирни "зиянлиқ вә әһмийәтсиз" дәп қариған. Булар явропа иттипақи дөләтлириниң хитайниң иқтисадий тәһдитигә тақабил туруп, өз мәнпәәтлирини қоғдаш җәһәттә техи толуқ бирликкә келип болалмиғанлиқини көрситип беридикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт