Явропадики бәзи дөләтләр америка билән бир қатарда уйғур мәсилисигә болған әндишисини ипадилиди

Мухбиримиз сада
2019-09-25
Елхәт
Пикир
Share
Принт

24-Сентәбир күни америка ташқи ишлар министирлиқи канада, германийә, голландийә вә әнглийә қатарлиқ дөләтләр билән бирликтә «шинҗаңдики кишилик һоқуқ кризиси» темисида бир муһакимә йиғини уюштурди.

Мәзкур йиғин американиң ню-йорк шәһиридики бирләшкән дөләтләр тәшкилати бинасида ечилған. Йиғинда америка ташқи ишлар министирлиқиниң муавин министири җон солливен, бирләшкән дөләтләр тәшкилати баш секретариниң хәлқаралиқ һоқуқларни қоғдаш бойичә алаһидә мәслиһәтчиси керрин симис қатарлиқлар муһим сөз қилған. Улар сөзлиридә хитайниң уйғур дияридики уйғур, қазақ, қирғиз вә башқа йәрлик мусулман милләтләргә йүргүзүватқан вә изчил давамлишиватқан бесимдин қаттиқ чөчүгәнликини билдүргән. 

Улар сөзлири давамида йәнә хитайниң 2017-йили апрелда башлиған зор көләмлик тутқунниң қурбанлириға айланған бир милйондин артуқ уйғур тутқун һәмдә һазирғичә мәлум болған мәҗбурий әмгәккә селиш, қийин-қистаққа елиш вә башқа сирлиқ өлүм хәвәрлиригә қарита хәлқара җәмийәтниң диққәт қилишини тәләп қилған. 

Йиғинда бу қетимлиқ муһакимә йиғининиң қошумчә саһибхана дөләтлиридин әнглийә вә германийәниң вәкиллириму айрим-айрим сөз қилған. Улар сөзидә өзлириниң уйғурларниң нөвәттики еғир әһвалидин қаттиқ әндишә қилидиғанлиқини, уларға келиватқан бу зулумға хатимә бериш үчүн күчиниң баричә тиришчанлиқ көрситидиғанлиқини ипадә қилған.

Пикирләр (0)
Share
Толуқ бәт