Явропа парламенти: «таш полат тейип қатарлиқ уйғур алим вә әдиблириниң өлүм җазаси дәрһал тохтитилиши керәк»

Мухбиримиз әркин
2019-09-27
Елхәт
Пикир
Share
Принт

Явропа парламенти кишилик һоқуқ комитетиниң рәиси мария арена 27‏-сентәбир күни баянат елан қилип, хитай ташполат тейип, саттар савут қатарлиқларни өз ичигә алған уйғур алим вә әдиблириниң өлүм җазасини дәрһал тохтитишқа чақирған.

У баянатида «мән атақлиқ уйғур алими, шинҗаң университетиниң сабиқ мудири ташполат тейипқа йеқинда өлүм җазаси иҗра қилинидиғанлиқи һәққидики хәвәрләрдин қаттиқ чөчүдүм. У 2017‏-йили из-дерәксиз йоқитилған вә һечким билән көрүштүрүлмигән, кейин мәхпий вә наһәқ сотланған. Униң «кечиктүрүлгән өлүм җазаси» ниң икки йилдин кейин өзгәртилиш еһтимал болсиму, бирақ нөвәттә униң җазаси йеқинда иҗра қилинишқа дуч келиватқанлиқи илгири сүрүлмәктә» дәп тәкитлигән. 

У баянатида йәнә охшашла уйғур аптоном районлуқ маарип назаритиниң сабиқ назири саттар савутниң өлүм җазаси иҗра қилиниш хәвпигә дуч келиватқанлиқини шундақла язғучи вә әдәбий тәнқидчи ялқун розиниң намәлум әйибләшләр билән узун йиллиқ қамаққа һөкүм қилинғанлиқини тәнқидләп, «мән уларни тутқун қилинған нурғун уйғур зиялийлири вә пуқралириға охшаш халиғанчә вә наһәқ тутқун қилинған, дәрһал қоюп берилиши керәк, дәп қараймән,» дегән.

Униң тәкитлишичә, у хитай һөкүмитини пиландики өлүм җазасини иҗра қилишни дәрһал тохтитип, бу кишиләрниң қәйәрдә икәнлики тоғрисида ишәнчлик учурлар билән тәминләшкә чақирған.

Хитай һөкүмити2017‏-йили шинҗаң университетиниң сабиқ мудири, профессор ташполат тейипни германийәгә бир хәлқара илмий йиғиниға маңғанда бейҗиң айродромида тутқун қилип, икки йил кечиктүрүлүп иҗра қилинидиған өлүм җазаси бәргән. Буниң алдида уйғур аптоном районлуқ маарип назаритиниң сабиқ назири саттар савут тутқун қилинип, икки йил кечиктүрүлүп өлүм җазасиға буйрулған. Хитайниң уйғур алим вә әдиблирини тутқун қилип өлүм җазаси яки узун йиллиқ қамақларға һөкүм қилиши хәлқарада қаттиқ тәнқидкә учрап кәлгән иди.

Пикирләр (0)
Share
Толуқ бәт