Yawropa parlaménti: "Tash polat téyip qatarliq Uyghur alim we ediblirining ölüm jazasi derhal toxtitilishi kérek"

Muxbirimiz erkin
2019-09-27
Élxet
Pikir
Share
Print

Yawropa parlaménti kishilik hoquq komitétining re'isi mariya aréna 27‏-séntebir küni bayanat élan qilip, xitay tashpolat téyip, sattar sawut qatarliqlarni öz ichige alghan Uyghur alim we ediblirining ölüm jazasini derhal toxtitishqa chaqirghan.

U bayanatida "Men ataqliq Uyghur alimi, shinjang uniwérsitétining sabiq mudiri tashpolat téyipqa yéqinda ölüm jazasi ijra qilinidighanliqi heqqidiki xewerlerdin qattiq chöchüdüm. U 2017‏-yili iz-déreksiz yoqitilghan we héchkim bilen körüshtürülmigen, kéyin mexpiy we naheq sotlan'ghan. Uning "Kéchiktürülgen ölüm jazasi" ning ikki yildin kéyin özgertilish éhtimal bolsimu, biraq nöwette uning jazasi yéqinda ijra qilinishqa duch kéliwatqanliqi ilgiri sürülmekte" dep tekitligen. 

U bayanatida yene oxshashla Uyghur aptonom rayonluq ma'arip nazaritining sabiq naziri sattar sawutning ölüm jazasi ijra qilinish xewpige duch kéliwatqanliqini shundaqla yazghuchi we edebiy tenqidchi yalqun rozining namelum eyibleshler bilen uzun yilliq qamaqqa höküm qilin'ghanliqini tenqidlep, "Men ularni tutqun qilin'ghan nurghun Uyghur ziyaliyliri we puqralirigha oxshash xalighanche we naheq tutqun qilin'ghan, derhal qoyup bérilishi kérek, dep qaraymen," dégen.

Uning tekitlishiche, u xitay hökümitini pilandiki ölüm jazasini ijra qilishni derhal toxtitip, bu kishilerning qeyerde ikenliki toghrisida ishenchlik uchurlar bilen teminleshke chaqirghan.

Xitay hökümiti2017‏-yili shinjang uniwérsitétining sabiq mudiri, proféssor tashpolat téyipni gérmaniyege bir xelq'ara ilmiy yighinigha mangghanda béyjing ayrodromida tutqun qilip, ikki yil kéchiktürülüp ijra qilinidighan ölüm jazasi bergen. Buning aldida Uyghur aptonom rayonluq ma'arip nazaritining sabiq naziri sattar sawut tutqun qilinip, ikki yil kéchiktürülüp ölüm jazasigha buyrulghan. Xitayning Uyghur alim we ediblirini tutqun qilip ölüm jazasi yaki uzun yilliq qamaqlargha höküm qilishi xelq'arada qattiq tenqidke uchrap kelgen idi.

Toluq bet