Yehudiy chong qirghinchiliqidin aman qalghan shahitlar boris jonsonning Uyghurlarni qollishini telep qildi

Muxbirimiz erkin
2021-02-23
Share

2-Dunya urushida natsistlarning yehudiy chong qirghinchiliqidin aman qalghan shahitlar en'gliye bash ministiri boris jonsonning irqiy qirghinchiliq qanunidiki talash tartishlarda Uyghurlarni qollishini telep qilghan. "Siyaset" gézitining xewer qilishiche, yehudiy chong qirghinchiliqidin aman qalghan rut barnét, dorit oliwér wolf isimlik ikki yashan'ghan yehudiy ayal 23-féwral boris jonson'gha qarita ochuq xet élan qilip, en'gliyening "Shinjangdiki musulman Uyghurlar uchrawatqan irqiy qirghinchiliqni étirap qilish üchün yiterlik küch chiqarmighanliqidin qattiq ensireydighanliqi" ni bildürgen.

Ular bu chaqiriqni en'gliye soda qanunigha "Irqiy qirghinchiliq" maddisini kirgüzüsh toghrisidiki qanun tüzütish layihesi en'giliye yuqiri palatasida qayta sunulghan mezgilde élan qilin'ghan. Rut barnét bilen dorit oliwer wolf özlirining chaqiriqini widéyo arqiliqmu élan qilghan. Ular chaqiriqida, "Oylash iqtidarigha ige herqandaq ademning shinjangdiki irqiy qirghinchiliqqa uchrawatqan Uyghurlarni we dunyaning bashqa jayliridiki xelqlerni oylishi kérekliki", boris jonsonning ular bilen körüshüp, "Jiddiy özgertishke tegishlik bu mesililerni muzakire qilishi" ni telep qilghan.

Ular "Biz sizning teklipimizni qobul qilip, kelgüside Uyghur qirghinchiliqini xatirlesh ehwaligha chüshüp qalmasliqimizgha kapaletlik qilishingizni ümid qilimiz" dégen. Boris jonson ötken hepte Uyghur we xongkong mesilisini aldinqi orun'gha qoyudighanliqini bildürgen. Biraq u buning aldida en'glye sotining irqiy qirghinchiliq erzilirini qobul qilip, uninggha hökum qilishigha yol qoyush toghrisidiki soda qanunigha tüzütish kirgüzüsh lahiyesining awam palatasida maqullunishigha kashila qilghanidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet