«Исраилийә вақти» гезити: «йәһудийлар хитайдики уйғурлар үчүн дәс туруши керәк»

Мухбиримиз ирадә
2019-04-12
Елхәт
Пикир
Share
Принт

Бүгүн исраилийәдики нопузлуқ гезитләрниң бири болған «исраилийә вақти» гезитидә елан қилинған бир мақалидә барлиқ йәһудийлар уйғурларни қоллашқа чақирилди.

«Йәһудийлар хитайдики уйғурлар үчүн орнидин дәс туруши керәк» мавзулуқ мақалә төвәндики җүмлиләр билән башланған:

«Йәһудийларға етник қирғинчилиқниң немиликини чүшәндүрүш һаҗәтсиз. Биз униң бир кечидила йүз бәрмәйдиғанлиқини билимиз. Биз униң алди билән бир мәдәнийәтни қарилаш билән башлинидиғанлиқини, өчмәнлик вә бесимниң нормиға айландурулидиғанлиқини, арқидин, инсанларниң бир-бирләп ғайиб болушқа башлайдиғанлиқини билимиз. Мана бу бүгүн хитайда йүз бәрмәктә.»

Хәвәр мақалисидә йәнә уйғурларниң кимлики һәққидә вә шундақла хитай һөкүмитиң йиллардин бери уйғурларға қаритип келиватқан бастуруш вә ассимилятсийә сиясәтлиридин мәлумат берилгән вә һазир бир милйондин ошуқ уйғурниң хитайдики «қайта тәрбийә лагерлири» да зулум чекиватқанлиқи баян қилинған.

Мақалидә аптор йәһудийларниң тарихта лагер түзүмини баштин кәчүргән бир хәлқ болуш сүпити билән бүгүн уйғур хәлқигә йүргүзүлүватқан зулумға қарши сада чиқиришта алаһидә мәсулийити барлиқини, һәрбир йәһудийниң пурсәт тапсила бу мәсилини көтүрүп чиқиши керәкликини әскәрткән.

Хәвәрдин мәлум болушичә, универсал кишилик һоқуқ хитабнамисиниң язғучилириниң бири шундақла нобел тинчлиқ мукапатиниң саһиби болған фирансийәлик йәһудий рини кассинниң намиға қурулған фонди җәмийәттә 9-май күни «йәһудийларниң уйғур кризиси һәққидики инкаслири» темисида бир илмий муһакимә йиғини өткүзүлидикән.

Пикирләр (0)
Share
Толуқ бәт