"Isra'iliye waqti" géziti: "Yehudiylar xitaydiki Uyghurlar üchün des turushi kérek"

Muxbirimiz irade
2019-04-12
Élxet
Pikir
Share
Print

Bügün isra'iliyediki nopuzluq gézitlerning biri bolghan "Isra'iliye waqti" gézitide élan qilin'ghan bir maqalide barliq yehudiylar Uyghurlarni qollashqa chaqirildi.

"Yehudiylar xitaydiki Uyghurlar üchün ornidin des turushi kérek" mawzuluq maqale töwendiki jümliler bilen bashlan'ghan:

"Yehudiylargha étnik qirghinchiliqning némilikini chüshendürüsh hajetsiz. Biz uning bir kéchidila yüz bermeydighanliqini bilimiz. Biz uning aldi bilen bir medeniyetni qarilash bilen bashlinidighanliqini, öchmenlik we bésimning normigha aylandurulidighanliqini, arqidin, insanlarning bir-birlep ghayib bolushqa bashlaydighanliqini bilimiz. Mana bu bügün xitayda yüz bermekte."

Xewer maqaliside yene Uyghurlarning kimliki heqqide we shundaqla xitay hökümiting yillardin béri Uyghurlargha qaritip kéliwatqan basturush we assimilyatsiye siyasetliridin melumat bérilgen we hazir bir milyondin oshuq Uyghurning xitaydiki "Qayta terbiye lagérliri" da zulum chékiwatqanliqi bayan qilin'ghan.

Maqalide aptor yehudiylarning tarixta lagér tüzümini bashtin kechürgen bir xelq bolush süpiti bilen bügün Uyghur xelqige yürgüzülüwatqan zulumgha qarshi sada chiqirishta alahide mes'uliyiti barliqini, herbir yehudiyning purset tapsila bu mesilini kötürüp chiqishi kéreklikini eskertken.

Xewerdin melum bolushiche, uniwérsal kishilik hoquq xitabnamisining yazghuchilirining biri shundaqla nobél tinchliq mukapatining sahibi bolghan firansiyelik yehudiy rini kassinning namigha qurulghan fondi jem'iyette 9-may küni "Yehudiylarning Uyghur krizisi heqqidiki inkasliri" témisida bir ilmiy muhakime yighini ötküzülidiken.

Toluq bet