Йәркән дәрясиниң сүйини тизгинләш үчүн селинған «араташ су түгүни қурулуши» ишқа киришкән

Мухбиримиз ирадә
2019-11-21
Елхәт
Пикир
Share
Принт

Уйғур елидики муһим су мәнбәлиридин бири болған йәркән дәрясиниң сүйини тизгинләшни мәқсәт қилған «араташ су тосмиси» рәсмий ишқа кириштүрүлгән.

Мәзкур су тосма қурулуши 2015-йили башланған болуп, у хитай дөләт кабинети биваситә бекиткән вә хитай бойичә 100 чоң қурулушниң бири қатариға киргүзүлгән муһим су қурулуши иди.

«Тәңритағ» ториниң бу һәқтики хәвиридин қариғанда, 19-ноябир күни йәркән дәряси араташ сучилиқ түгүни қурулушида рәсмий һалда су сақлаш мурасими өткүзүлгән болуп, бу су амбириниң омумий су сиғими 2 милярд 249 милйон куб метирға йетидикән.

Йәркән араташ су тосмиси қурулушиға җәмий 10 милярд 986 милйон йүән мәбләғ селинған болуп, у қейинлиқ дәриҗисиниң юқири болуши вә зор мәбләғ селинған болушидәк алаһидиликлири түпәйли хитайдики таратқуларда «шинҗаңдики сәншя қурулуши» дәп аталған.

Йеқинқи йиллардин буян хитай һөкүмитиниң уйғур елидики тарим дәрясиниң сүйини әслигә кәлтүрүш, йәркән дәряси қатарлиқ көп дәря-еқинларни ечишқа охшаш суға мунасивәтлик қурулушларға алаһидә әһмийәт бериватқанлиқи диққәт қозғимақта.

Хитайниң ахбарат васитилири «араташ су амбири арқилиқ йәркәндики кәлкүн апитиниң алдини елиш, су вә ток билән тәминләшни капаләткә игә қилиш арқилиқ хәлқниң иқтисадини яхшилиғили болиду», дәп тәшвиқ қилған. Бирақ чәтәлләрдики уйғур көзәткүчиләр хитай һөкүмитиниң кәлгүсидә уйғур елиниң җәнубидики тарим вә йәркән дәря бойлириға зор көләмдә хитай көчмән йөткәшкә тәйярлиқ қиливатқанлиқини пәрәз қилмақта.

Дуня уйғур қурултийиниң баянатчиси дилшат ришит радийомизға қилған сөзидә «хитайниң уйғур районида лагер түзүмини йолға қоюш билән мас қәдәмдә су қурулушлириға зор мәбләғ аҗритиши һәргизму тасадипийлиқ әмәс, у йәниму көп хитай аһалисини йәрләштүрүшни мәқсәт қилиду,» дәп әскәртти.

Омумий узунлуқи 1289 километир келидиған йәркән дәря еқинида нөвәттә 4 милйон әтрапида нопус бар болуп, бу су қурулушиниң тамамлиниши билән бу нопусниң қанчә һәссә өрләйдиғанлиқи көзәткүчиләрниң диққитини қозғимақта.

Пикирләр (0)
Share
Толуқ бәт