Yeken nahiyiside dölet kadirlirigha uruq-tughqanliri we dostlirini roza tutushtin cheklesh wezipisi bérildi

Yeken nahiyisining wéybo toridiki köznikide bérilgen bir uqturushtin ashkarilinishiche, yeken nahiyisi awat baziridiki kadirlar öz tughqanliri we dost-yar, buraderlirini roza tutushtin chekleshke orunlashturulghan.

Melum bolushiche, awat bazarliq hökümetning mu'awin partkom sékrétari iminjan exet “Ramzan mezgilidiki bashqurushni kücheytish, ikkini eyiblesh” yighinida mexsus söz qilip, herbir kadirni uruq-tughqanliri we dost-yar, buraderlirige qaratqan teshwiqatni qattiq kücheytip, ularning ramzan éyida rozi tutushini qattiq chekleshni telep qilghan.

Buningdin sirt, aqsu wilayetlik hökümet tor bétide bérilgen xewerdin melum bolushiche, wilayet rehberliri charshenbe küni wilayet tewesidiki bir qisim meschitlerni ziyaret qilip, atalmish “Wetenperwer dini zat” lar bilen uchrashqan we ulardin üch xil küchlerge qet'iy qarshi turush, diniy radikalliqqa ortaq qarshi turushni telep qilghan.

Xitay hökümitining Uyghurlarni roza tutushtin chekleshke urunush herikiti xelq'ara kishilik hoquq organliri we amérika dölet mejlisining qattiq tenqidige uchrimaqta. Emma Uyghur rayonluq hökümetning ishxana mudiri xu xenming chet'el muxbirlirigha bergen bayanatida Uyghur élide peqet kadirlar we oqughuchilarning roza tutushtin cheklinidighanliqini, bundaq qilishta ularning salametlikining közde tutulghanliqini ilgiri sürgen idi.