Хитай йеңи зеландийә зәйтун топ чолпининиң уйғур мәсилисидә «қаймуқтуруш» қа учриғанлиқини билдүргән

Мухбиримиз әркин
2019-12-25
Елхәт
Пикир
Share
Принт

Хитайниң йеңи зеландийәдә турушлуқ әлчиханиси баянат елан қилип, атақлиқ йеңи зеландийә зәйтун топ чолпини соний бил виллиямисниң уйғур мәсилисидә «сахта хәвәрләр» ниң қаймуқтурушиға учриғанлиқини билдүргән.

Соний бил виллиямис 23‏-декабир күни германийәлик путбол чолпини мәсут өзилниң уйғурлар һәққидики сөзини қоллап, хитайниң уйғурларниң кишилик һоқуқини дәпсәндә қиливатқанлиқини тәнқидлигән. У өзиниң тивиттерида хитайниң бәш юлтузлуқ қизил байриқида боялған бир қолниң ай юлтузлуқ шәрқий түркистан байриқида боялған йәнә бир қолни қаттиқ сиқип, қанға бойивәткәнлик һәққидики бир сизма рәсим елан қилип: «бизниң инсанлиқ орниға иқтисадий мәнпәәтни таллишимиз ечинишлиқтур,» дәп язған. Униң сөзи хәлқара таратқуларда қаттиқ ғулғула қозғиған иди.

«Неюс хуб» намлиқ йеңи зеландийә телевизийә қанилиниң хәвәр қилишичә, хитайниң йеңи зеландийәдики әлчиханисиниң баянатчиси мәзкур телевизийә қанилида баянат елан қилип, соний бил виллиямисни «сахта хәвәрләр» ниң қаймуқтурушиға учрап кетиш билән әйиблигән. Хитай әлчиханисиниң баянатчиси «хитайниң игилик һоқуқи вә земин пүтүнлүкигә бузғунчилиқ қилиш йолидики һәрқандақ урунушқа қарши туридиғанлиқи» ни тәкитлигән. Униң илгири сүрүшичә, «бәзи сахта хәвәрләр вә ялғанчилиқлар бир қисим кишиләрниң көзини етивалған» икән. Баянатта «уларниң хитайниң террорлуққа қарши туруш, радикаллиқни түгитиш күришигә обйектип қаришини үмид қилидиғанлиқи» тәкитләнгән.

Хитай һөкүмити илгири уйғурларни қоллап, мусулманларни уйғурлар учраватқан зулумға сүкүт қилиш билән әйиблигән германийәлик путбол чолпини мәсут өзилниму «сахта хәвәрләр» ниң қаймуқтурушиға учрап кетиш билән әйиблигән иди.

Пикирләр (0)
Share
Толуқ бәт