Хитай һөкүмитиниң «ғәрбий районни йеңичә ечиш» шоари шүбһә қозғимақта

Мухбиримиз әзиз
2020-05-19
Елхәт
Пикир
Share
Принт

Хитай мәркизий һөкүмити йеқинда «йеңи дәврдики ғәрбий қисимни зор көләмдә ечишниң йеңи вәзийитини шәкилләндүрүш тоғрисидики йетәкчи пикир» намлиқ һөҗҗәтни бесип тарқатти. Уйғурлар дияридики вәзийәт билән яхши тонушлуқ анализчилар бу һәқтә пикир қилип, «бу һал вәтинимиздики вәзийәтниң йеқин кәлгүсидә техиму қаттиқ тәдбирләргә макан болидиғанлиқидин алдин бешарәттур» дәп көрсәтти.

Шинхуа агентлиқиниң 19-майдики хәвиригә қариғанда, хитай һөкүмити башқурушидики «хәлқ тори» бу мәсилини мәхсус тонуштуруп, һәр дәриҗилик орунларниң пайдилинишиға сунған.

Буниңда алди билән тәкитләнгән нуқтиларниң бири енергийә байлиқи җәһәттики тәминләш қурулмисини мукәммәлләштүрүш, қатнаш-транспортни мәркәз қилған һүл муәссәсә қурулушини ашуруш, дөләтниң бихәтәрлики вә иҗтимаий муқимлиқни қәтий әмәлийләштүрүш болған. Шуниңдәк ғәрбий районни мустәһкәм контрол қилиш арқилиқ бу җайларниң хитай дөлити үчүн бихәтәрлик қалқини болуш ролини техиму яхши җари қилдуруш алаһидә тәкитләнгән.

«Хитай хәвәрлири тори» ниң хәвиридә ейтилишичә, хитайниң зор мәбләғ вә күч сәрп қилиш бәдилигә башланған «бир бәлвағ бир йол қурулуши» ниң бундин кейинки тәрәққияти үчүн уйғурлар диярини ғәрб-шәрқ оттурисидики қатнаш алақисини раванлаштурғучи амил қилиш, бу арқилиқ «сусиз порт» шәһәрлири қурулушини алға сүрүп, хитайниң ғәрб тәрәптики әлләр билән болған иқтисадий алақисини күчәйтишму буниңдики асаслиқ мәзмунлардин икән.

Хитайниң «ғәрбни зор көләмдә ечиш» қурулуши әйни вақитта «ғәрбий қисимларниң тәрәққиятини тезлитиш» дегән намда башланғаниди. Әмма буниң маһийәттә ғәрбий қисимдики көмүр, нефит, тәбиий газ қатарлиқ енергийә базилирини қезиштики көләм вә миқдарни ашуруш болғанлиқи аридин көп өтмәй ашкара болған иди. Муһаҗирәттики бир қисим анализчилар мушу әһвалға асасән хитай һөкүмитиниң бу қетимқи йеңи һөҗҗитини хитайниң шәрқ тәрәптин һуҗумға учрап қалса хитай үчүн керәклик болған енергийәни ғәрб тәрәптин капаләткә игә қилиш пиланиниң бир қисми, дәп қараватқанлиқи мәлум. Мустәқил көзәткүчи елшат һәсән мушу хил пикиргә майил болуп, «шүбһисизки бундақ бир зор пиланни иҗра қилишқа киришкән хитай һөкүмити бизниң вәтинимиздә һазирқидинму еғир болған контроллуқ вә бастуруш сиясәтлирини иҗра қилиду» деди.

Пикирләр (0)
Share
Толуқ бәт