Xitay da'iriliri "Yépiq terbiyelesh merkezliri" heqqidiki xewerlerge tunji qétim inkas qayturdi

Muxbirimiz shöhret hoshur
2018-02-07
Élxet
Pikir
Share
Print

Qirghizistanning a k axbarat agéntliqining xewer qilishiche, xitayning qazaqistandiki bash elchisi bügün almutada échilghan axbarat élan qilish yighinida xitayning Uyghur aptonom rayonida tesis qilin'ghan "Yépiq terbiyelesh merkezliri" heqqidiki bir so'algha duch kelgen. Xitay bash elchisi jawabida Uyghur aptonom rayonida "Yépiq terbiyelesh merkezliri" ning mewjutluqini inkar qilghan.

Qazaqistandiki xitay bash elchisi jang wéy bu so'alni sorighan muxbirni mezkur xewerni tarqatqan amérikining s n n téléwiziyesidin sorashqa dewet qilghan. Bu xitay da'irilirining rayonda arqa-arqidin qurghan atalmish "Yépiq terbiyelesh merkezliri" heqqide xelq'arada tunji qétim éghiz échishi bolup hésablinidu.

Jang wéy sözide xitayning bixeterlik tedbirlirini aqlap, dölet bixeterliki üchün élinidighan chare-tedbirlerning herqandaq dölette, jümlidin qazaqistan yaki amérikidimu mewjutluqini, shu mentiqidin alghanda xitayda bolushiningmu zörür ikenlikini tekitligen. Emma u bu döletlerning bixeterlik tedbirliri arisidiki mahiyetlik perqlerni, bolupmu xitaydiki melum bir milletni kolléktip jazalash mesilisi üstide éghiz achmighan.

Uyghur élida bultur 3‏-aydin bashlan kéngeytip tesis qilin'ghan "Yépiq terbiyelesh merkezliri" bultur awghust éyida tunji bolup radiyomiz teripidin xelq'aragha ashkarilan'ghan idi. Shuningdin kéyin dunyadiki nopuzluq axbarat orunliridin "Télégraf géziti", "Nyu-york waqti géziti", "Wal-strét zhurnili" we s n n téléwiziyesi bu heqte xewerler berdi. S n n téléwiziyesi bilen "Télégraf géziti" radiyomiz xewerliridin neqil keltürüp, qeshqerde 120 ming kishining "Yépiq terbiyelesh merkizi" de ikenlikini xewer qilghan bolsa, "Nyu-york waqti géziti" bu lagérlardiki Uyghurlarning sanini 500 mingdin artuq dep xewer qildi.

Dunya Uyghur qurultiyining aliy rehbiri rabiye qadir xanim 25-yanwar küni dunyagha élan qilghan "Yépiq terbiyelesh merkezliri" ni taqash heqqidiki muraji'etnamiside mezkur lagérlardiki kishiler sanining bir milyon etrapida ikenlikini ilgiri sürgen idi.

Toluq bet