D u q: muhajirettiki Uyghurlarni "Yépiq terbiye lagérliri" diki qérindashliri heqqide melumat bérishke dewet qildi

Muxbirimiz shöhret hoshur
2018-02-26
Élxet
Pikir
Share
Print

Dunya Uyghur qurultiyi 25-féwral küni bir uqturush tarqitip, muhajirettiki Uyghurlardin Uyghur rayonidiki "Yépiq terbiyelesh lagérliri" da tutup turuluwatqan, iz-dériki bolmighan we türmige tashlan'ghan qérindashliri hem tonush -bilishliri heqqide melumat bérishke chaqirdi.

Uqturushta qurultayning b d t alaqidar organliri, yawropa ittipaqi we herqaysi dölet hökümetlirige Uyghur rayonidiki "Yépiq terbiye lagérli" heqqide delil-ispat sunushqa hazirliniwatqanliqi eskertildi.

Melum bolushiche, Uyghur rayonidiki "Yépiq terbiye lagérliri" muhajirettiki Uyghur teshkilatlirining pa'aliyetliride merkizi nuqta we aldinqi rettiki mesile süpitide orun almaqta. Aldinqi hepte yaponiyeni ziyaret qilghan dunya Uyghur qurultiyi aliy rehbiri rabiye qadir xanim we uning wekiller guruppisimu "Yépiq lagér" mesilisini yaponiyede nuqtiliq halda tonushturghan idi.

Türkiyede panahlinip turuwatqan tijaretchi abduraxman hesen bu ayning béshida apisi we ayalining "Yépiq terbiye lagéri" gha ekétilgenliki we u yerdiki kechmishi heqqide uchur we tesiratini istanbuldiki Uyghurche "Istiqlal" tor téléwiziyede ashkarilighandin kéyin, xelq'ara axbarat wasitiliriningmu diqqitini tartqan we kengri xewer qilin'ghan idi.

Dunya Uyghur qurultiyining bu qétimqi uqturushida Uyghur muhajirlardin özlirining "Yépiq terbiye lagérliri" diki biwasite uruq-tughqanlirining kimlik melumatliridin bashqa yene "Yépiq lagér" gha alaqidar ijtima'iy axbarat wasitiliride tarqalghan yaki shexsiy saqlap kéliwatqan resim, awaz we yazma uchurlar bolsimu yetküzüshini telep qilghan.

Toluq bet