Muhapizetchi géziti: “Xitayning yépiq terbiyelesh lagérliri pakistanliq erlerni ayalliridin ayridi”

Muxbirimiz irade
2018.03.15

En'gliyede chiqidighan “Muhapizetchi géziti” 15 ‏-mart küni xewer qilishiche, pakistanning Uyghur aptonom rayonigha chégridash gilgit baltistan rayonidiki 50 tin artuq gilgit-baltistanliq er hazirghiche Uyghur millitidin bolghan ayallirining iz-dérikini alalmighan.

Yéqinda, gélgit-baltistan parlaménti bir qarar layihesi maqullap, pakistan fédératsiye hökümitidin 50 neper gélgitliq erning Uyghur millitidin bolghan ayallirining“ Terbiyelesh lagéri”din qoyup bérilishi üchün heriketke ötüshini telep qilghan idi. Biraq, gilgit-baltistan parlaménti ezasi jawid hüseyin yuqiridiki gézitke qilghan sözide, pakistan fédératsiye hökümitining özlirige téxiche bir jawab bermigenlikini bildürgen.

Ayali yépiq “Terbiyelesh”ke tutup kétilgen gélgit-baltistanliq er exmet özining ayalini eng axirqi qétim ötken yili dékabirda körgenlikini, xitay da'irilirining hetta balisini éliwélishqimu yol qoymay uni jigiridin chiqiriwetkenlikini we qayta kirgüzmigenlikini éytip bergen.

Mezkur gézit gérmaniyelik tetqiqatchi adriyan zénzni ziyaret qilghan. Adriyan zénz sözide: “Xitayning bu herikitining chet'ellerge chiqip baqqan herbir kishige qaritilghanliqini, yuqiridiki bu Uyghur ayallarning qutulushining pakistanning jasaritige baghliq bolup qalghanliqini” éytqan.

Exmet bolsa eger pakistan hökümiti bu ishni hel qilalmighan teqdirde, özining bu mesilini zoraytip gilgit-baltistanda zor namayish uyushturidighanliqini, hetta “Bir belwagh bir yol qurulushi” üchün intayin muhim bolghan chégranimu taqatquziwétishke heriket qilidighanliqini éytip, “Chünki, bizge oxshash teqwadar kishiler üchün bu bizning sheripimizge qilin'ghan hujum bolup hésablinidu” dégen.

Nöwette pakistanliqlar bilen toy qilghan Uyghur ayallirining omumiy sani melum emes. Lékin gilgit-baltistan parlaméntining qarar layiheside körsitishiche, pakistan-xitay otturisida import-éksport tijariti bilen shughullinidighan 50 din artuq gilgit-baltistanliqning ayali Uyghur iken. Qarar layiheside, xitay hökümitining gilgit-baltistanliqlar bilen toy qilghan bu ayallarning tutqan qilghanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.