Америка ташқи мунасивәтләр кеңиши уйғур елидики «йепиқ лагер» лар мәсилисини тилға алди

Мухбиримиз шөһрәт һошур
2018-04-11
Елхәт
Пикир
Share
Принт

Америкидики «ташқи мунасивәтләр кеңиши» намлиқ бир тәтқиқат гурупписи бүгүн «хитайдики динлар» дегән темида доклат елан қилди.

Доклатта уйғур вәзийитигә мәхсус орун берилгәндин башқа, уйғур елиниң нөвәттики әң җиддий мәсилиси болған «йепиқ тәрбийә лагерлири» мәсилиси тилға елинди.

Хитайда динға етиқад қилғучиларниң барғансери көпийиватқанлиқи, әмма уларға қарита бесимниңму барғансери ешиватқанлиқи шәрһләнгән доклатта уйғурларниң зулумға учраватқанлар арисида әң еғири икәнлики қәйт қилинған. Охшашла ислам диниға етиқад қилсиму, лекин туңганларға нисбәтән ейтқанда уйғурларниң диний әркинликиниң пүтүнләй боғулғанлиқи әскәртилгән мәзкур доклатта бу пәрққә уйғурларниң қошна әлләр билән болған етник вә диний бағлиниши шундақла районда үзлүксиз йүз бәргән қаршилиқ һәрикәтлириниң сәвәб болғанлиқи илгири сүрүлгән.

Доклатта дейилишичә, уйғур районида һөкүмәт орунлири вә пуқраларға қарши йүз бәргән партлитиш вә пичақлиқ һуҗумларни хитай һөкүмити «шәрқи түркистан ислам һәрикити» гә бағлап әйиблимәктә икән. Әмма бәзи кишилик һоқуқ тәшкилатлири болса бу һәрикәтләрниң зулумға қарши тәбиий партлап чиққан наразилиқ һәрикити икәнликини илгири сүрмәктә.

Доклатта йәнә йеқинқи мәзгилләрдә уйғур районида зәрбә бериш һәрикәтлириниң пәвқуладдә күчәйгәнлики, буниң нәтиҗисидә сақал, чүмбәл, «қуран-кәрим», роза тутуш вә исламий исимлар чәклимиси қатарлиқлар йолға қоюлуш билән бирликтә уйғурларниң «тәрбийәләш лагерлири» ға солувелинғанлиқи қәйт қилинған.

«Америка ташқи мунасивәтләр кеңиши» америка һөкүмитигә ташқи сиясәттин мәслиһәттин сунидиған нопузлуқ бир тәтқиқат орнидур.

Пикирләр (0)
Share
Толуқ бәт