Amérika tashqi munasiwetler kéngishi Uyghur élidiki "Yépiq lagér" lar mesilisini tilgha aldi

Muxbirimiz shöhret hoshur
2018-04-11
Élxet
Pikir
Share
Print

Amérikidiki "Tashqi munasiwetler kéngishi" namliq bir tetqiqat guruppisi bügün "Xitaydiki dinlar" dégen témida doklat élan qildi.

Doklatta Uyghur weziyitige mexsus orun bérilgendin bashqa, Uyghur élining nöwettiki eng jiddiy mesilisi bolghan "Yépiq terbiye lagérliri" mesilisi tilgha élindi.

Xitayda din'gha étiqad qilghuchilarning barghanséri köpiyiwatqanliqi, emma ulargha qarita bésimningmu barghanséri éshiwatqanliqi sherhlen'gen doklatta Uyghurlarning zulumgha uchrawatqanlar arisida eng éghiri ikenliki qeyt qilin'ghan. Oxshashla islam dinigha étiqad qilsimu, lékin tungganlargha nisbeten éytqanda Uyghurlarning diniy erkinlikining pütünley boghulghanliqi eskertilgen mezkur doklatta bu perqqe Uyghurlarning qoshna eller bilen bolghan étnik we diniy baghlinishi shundaqla rayonda üzlüksiz yüz bergen qarshiliq heriketlirining seweb bolghanliqi ilgiri sürülgen.

Doklatta déyilishiche, Uyghur rayonida hökümet orunliri we puqralargha qarshi yüz bergen partlitish we pichaqliq hujumlarni xitay hökümiti "Sherqi türkistan islam herikiti" ge baghlap eyiblimekte iken. Emma bezi kishilik hoquq teshkilatliri bolsa bu heriketlerning zulumgha qarshi tebi'iy partlap chiqqan naraziliq herikiti ikenlikini ilgiri sürmekte.

Doklatta yene yéqinqi mezgillerde Uyghur rayonida zerbe bérish heriketlirining pewqul'adde kücheygenliki, buning netijiside saqal, chümbel, "Qur'an-kerim", roza tutush we islamiy isimlar cheklimisi qatarliqlar yolgha qoyulush bilen birlikte Uyghurlarning "Terbiyelesh lagérliri" gha soluwélin'ghanliqi qeyt qilin'ghan.

"Amérika tashqi munasiwetler kéngishi" amérika hökümitige tashqi siyasettin meslihettin sunidighan nopuzluq bir tetqiqat ornidur.

Toluq bet