Ayalliri "Yépiq terbiye lagéri" diki gilgit-baltistanliq erler pakistan hökümitidin jawab alalmighan

Muxbirimiz irade
2018-04-18
Élxet
Pikir
Share
Print

Uyghur ayallar bilen öylen'gen 50 tin artuq gilgit-baltistanliq er Uyghur élidiki "Terbiyelesh lagéri" gha élip kétilgen öz ayallirining iz-dérikini qilishni dawam qilmaqta.

"Asiya waqti" gézitining seyshenbe künidiki xewiride, eger gilgitliq erlerning mesilisige pakistan we yaki xitay hökümitidin razi qilghudek bir jawab kelmise, buning "Xitay-pakistan iqtisad karidori" we "Bir belwagh bir yol qurulushi" gha tehdit peyda qilishi mumkinliki bildürülgen.

Ayalliri yépiq "Terbiyelesh" ke tutup kétilgen gilgit-baltistanliq erler bir yildin artuq waqittin béri ayalliri we baliliridin xewer alalmaywatqan bolup, xitay da'iriliri eyni waqitta ularning Uyghur élide turushluq qeghizini bikar qilip chégradin chiqiriwetken. Ularning qolida qanunluq wizisi bar bolsimu, xitay chégra da'iriliri ularni chégradin qayta kirgili qoymighan. Malik isimlik kishi gézitke qilghan sözide, özining bir yildin artuq waqittin béri ayalidin xewer alalmighanliqini, pakistan-xitay her ikkila hökümetning özlirige bir jawab bermeywatqanliqini éytqan.

Uyghur élidiki "Yépiq terbiyelesh lagérliri" sewebidin ayali we baliliridin ayrilghan 50 tin oshuq gilgit-baltistanliq er xitay hökümitidin derhal ayalliri we balilirini qoyup bérishni telep qilghan. Gilgit-baltistan rayonidiki herqaysi siyasiy we ammiwi teshkilatlar, tijaret organliri birlikte bayanat élan qilip, xitay hökümiti gilgit-baltistanliqlarning ayallirini tutup turushni dawam qilghan teqdirde, xitay bilen bolghan barliq tijariy alaqilerni bayqut qilidighanliqini we pakistan-xitay chégrasini taqaydighanliqini jakarlighan idi.

Emma pakistan tashqi ishlar ministirliqidiki bir emeldar gézitke qilghan sözide, herqandaq yüz bergüsi bir namayishning pakistan-xitay dostluqigha tesir körsitishini xalimaydighanliqini bildürgen, biraq, pakistan hökümitining bu mesilide bir tirishchanliq körsetmeywatqanliqinimu étirap qilghan.

Bir pakistanliq hökümet emeldari bolsa "Asiya waqti géziti" ge qilghan sözide, xitay hökümitining Uyghurlarni "Wetenperwerlik" boyiche terbiyelep, ularning "Dölet bilen bolghan maslishishchanliqini ashurup, heqiqiy bir xitay puqrasi bolup chiqishi üchün lagérlargha tutqun qilghanliqi" ni éytqan.

Toluq bet