Xitay metbu'ati Uyghur rayonida “Yépiq terbiye lagérliri” ning mewjutluqini wasitilik halda étirap qildi

Xitay axbarat wasitiliri Uyghur rayonida bir yildin béri dawam qiliwatqan keng kölemlik “Yépiq terbiye” jaza dolqunigha qarita köz yumup kéliwatqan idi.

Xitay tashqi ishlar bayanatchisimu amérikining mezkur mesile heqqidiki xitaygha qarita tenqidini “Asassiz shikayetler” dep ret qilghan, yeni Uyghur rayonida “Yépiq terbiye lagérliri” ning mewjutluqini inkar qilghan idi.

9-May küni xitayning asasliq axbarat organliridin “Xelq géziti” aqsuda 34 neper “Mesilisi bar kadirning yépiq terbiyeni bashtin kechürgenliki” ni xewer qildi. “Xelq géziti” mezkur xewiride “Yépiq terbiyelinish” ni ochaqta qayta tawlinishqa oxshitish arqiliq “Yépiq terbiye lagérliri” ning jazalash funksiyesini ashkarilidi.

“Xelq géziti” ning 8-may sanida élan qilin'ghan mezkur xewerde “Yépiq terbiye” ni bashtin kechürgen 34 neper kadirdin 5 nepirining imtihandin ötelmigenliki üchün “Yépiq terbiye” körüshni dawam qiliwatqanliqi tilgha élin'ghan.

Xewerde yene “Yépiq terbiye” körgen kadirlarni bir yilghiche iz qoghlap nazaret qilish, ikki yilghiche östürmeslik qatarliq “Yépiq terbiye lagéri” sirtidiki jaza shekilliri heqqidimu melumat bérilgen.

Xewerde gerche “Yépiq terbiye” len'gen li we shü famililik ikki xitay kadirning ismi tilgha élin'ghan bolsimu, “Yépiq lagér” larning asasen Uyghurlar bilen tolghanliqi, bir qisim lagérlarda qazaqlarningmu köplüki, parixorluq sewebidin tutulghan xitay kadirlarningmu anda-sanda uchrap qalidighanliqi ilgiri rayondin igiligen uchurlirimizda delillen'gen idi.