Мәмәт тохти:"уйғурлар 21-әсирдики йиғивелиш лагерлириниң қурбанлири болмақта!"

Мухбиримиз әзиз
2018-05-18
Share

Һәрқайси ахбарат васитилири һәмдә мутәхәссислири бирдәк "үсти очуқ түрмә" дәп тәсвирләватқан уйғурлар дияридики сиясий вәзийәтниң йәрлик кишиләрниң һаятиға көрситиватқан сәлбий тәсири һәрқачан кишиләрниң диққитидә болуп кәлмәктә.

Д у қ көчмәнләр комитетиниң мудири мәмәт тохти имзасида 18-май күни "дипломат" тор бетидә елан қилинған бу һәқтики мақалида дәл мушу мәсилиләр муһакимә қилиниду.

Мақалида йеқинқи бирнәччә һәптә җәрянида америка һөкүмитидики юқири дәриҗилик хадимларниң уйғурлар дияридики еғирлап меңиватқан сиясий бастурушларға җиддий инкас қайтуруватқанлиқини әсләп өтүш билән биргә "тәрбийәләш мәркизи" дегән намда мәвҗут болуватқан бу җайларға бир милйондин көп уйғурниң қамалғанлиқи, бу орунлар һәққидә мәлум болуватқан түрлүк хәвәрләргә асасән бу "мәркәз"ләрни "йиғивелиш лагери" дәп аташқа пүтүнләй болидиғанлиқи оттуриға қоюлиду. Шуниңдәк "йиғивелиш лагери"ниң тәбири билән уйғурлар дияриниң һазирқи вәзийитиниң толуқ мас келидиғанлиқи алға сүрүлиду.

Мақалида йәнә хитай һөкүмитиниң өткән он нәччә йилда "террорлуққа қарши туруш" намида уйғурларни қаттиқ бастуруватқанлиқи, хитай һөкүмитиниң дуняви кеңәймичилик хаһишиниң нөвәттә "бир бәлвағ бир йол қурулуши" намида җиддий иҗра болуватқанлиқи, буниңдики өткүнчи макан болған уйғурлар дияриниң һәмдә униң игиси болған уйғурларниң нөвәттә ши җинпиңниң "арманлири" үчүн тосалғу дәп қариливатқанлиқи тәкитлиниду. Апторниң қаришичә, дәл мушу чүшәнчә сәвәбидин хитай һөкүмити уйғурларниң үнини бирақла өчүрүп ташлаш үчүн мақалида баян қилинған "йиғивелиш лагерлири" шәклидики муәссәсиләрни көпләп тәсис қилған. Буниң билән пүткүл уйғур миллити бир зор терагедийәгә дуч кәлмәктә икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт