"Xelq'ara soda waqti géziti" xitayning "Terbiyelesh lagérliri" dunyani chöchütkenlikini ilgiri sürdi

Muxbirimiz erkin
2018-06-08
Élxet
Pikir
Share
Print

Awstraliye "Xelq'ara soda waqti géziti" peyshenbe küni Uyghurlar heqqide maqale élan qilip, xitay hökümitining ramizan éyida Uyghurlarni basturushni yene kücheytkenliki, ularning diniy ibadet bilen shughullinishini cheklep, rozi tutushni men'iy qilghanliqini ilgiri sürdi.

Maqalida, xitayning Uyghurlarni basturuwatqanliqi melum bolsimu, lékin buning ramizanda keng kölemlik qanat yayduriliwatqanliqi tekitlen'gen.

Maqalida, basturushning "Ashqunluqni tügitish" namida Uyghur musulmanlirigha, diniy zatlargha we kishilik hoquq pa'aliyetchilirige hem pütün jem'iyetke qaritilghanliqi bildürülgen.

Maqalida yene, bu, xitayning musulmanlargha tutqan mu'amilisining tunji qétim diqqet qozghishi emesliki, uning 2015‏-yili ramizanda kishilerni roza tutmasliqqa wede bérishke qistighanda qattiq naraziliqqa uchrighanliqi tekitlen'gen.

Maqalida dunya Uyghur qurultiyi re'isi dolqun eysaning sözi neqil keltürülüp: "Ular kishilerni yighiwélish lagérlirigha dawamliq qamawatqan bolsimu, lékin uningdin peqet bir qanche kishila qaytip chiqalidi. Ularning kishilerni qandaq shara'itta tutqun qiliwatqanliqini héchkim bilmeydu we héchkim özini bixeter hés qilmaydu" déyilgen.

Yéqindin béri Uyghur rayonidiki yighiwélish lagérlirining ichki ehwali xelq'ara axbarat wasitilirining diqqitini tartishqa, bu lagérlar gérmaniyening natséstlar lagérlirigha sélishturulushqa bashlighan. "Xelq'ara soda waqti géziti" mezkur lagérlargha diqqet qozghighan xelq'ara metbu'atlarning biri.

Mezkur gézitining maqalisida xitayning Uyghurlarni basturupla qalmay, ularni yene lagérlargha qamighanliqi bildürülgen.

Maqalida, bu lagérlarda yétip chiqqan ikki kishining bu lagérlar heqqidiki bayani xewer qilinip, xitayning dunyani chöchütüwetkenliki ilgiri sürülgen. Yéqinda bu lagérlarda yétip chiqqan semerqent, ömerbék isimlik ikki qazaqistan puqrasi mezkur lagérlarda qebih jismaniy we rohiy jazagha uchrighanliqini ashkarilighan idi.

Toluq bet