Kishilik hoquq kéngishide Uyghur élidiki "Yépiq terbiye lagérlirini" derhal ayaghlashturush telep qilindi

Muxbirimiz irade
2018-06-25
Élxet
Pikir
Share
Print

25‏-Iyun düshenbe küni, birleshken döletler teshkilati kishilik hoquq kéngishining jenwede dawam qiliwatqan yighinida Uyghur élidiki "Yépiq terbiye lagérliri" mesilisi yene bir qétim tilgha élindi.

Istansimizning igilishiche, düshenbe küni chüshtin kéyinki yighinda xeter astidiki milletler teshkilati wekili söz élip, birleshken döletler teshkilati kishilik hoquq kéngishini Uyghur élidiki lagérlarni toxtitish mesiliside derhal tedbir élishqa chaqirdi.

Teshkilat wekili sözide töwendikilerni otturigha qoydi: "Xitay hökümiti bir yildin artuq waqittin béri Uyghur élide gunahsiz kishilerni tutqun qilip, ularni idiye özgertish lagérlirigha solimaqta.

2017‏-Yili aprél éyidin bashlap nechche yüz minglighan Uyghur mejburiy tutqun qilinip, bu orunlarda intayin nachar shara'itlarda we hetta qéyin-qistaq astida idiye özgertishke mejburlanmaqta. Uyghur a'ililiri weyran qilindi. Minglighan kishi yoqap ketti we eng az dégende 10 kishining u orunlarda ölgenliki ispatlandi".

Xeter astidiki milletler teshkilati wekili sözi dawamida xitay hökümitining bu herikitining peqetla Uyghurlarning kishilik hoquqigha qiliniwatqan éghir depsendichilik bolup qalmay belki uning pütkül bir milletke qaritilghan medeniyet assimilyatsiyesi we bir jem'iyetni qayta-özgertip yasash herikiti ikenlikini eskertti.

U shundaqla Uyghur élidiki weziyetning shu qeder éghirliqi, chet'ellerdiki Uyghur jama'iti, nopuzluq tetqiqatchilar we dunya axbaratlirining chaqiriqlirigha qarimay, nahayiti az sandiki döletlerningla bu mesilini ochuq-ashkara tilgha alghanliqini bildürüp, kishilik hoquqning uniwérsalliqigha, hemme kishining bu hoquq aldida barawerlikige ishinidighan dölet we shexslerni buni öz emeliyitide ipadilep derhal heriketke ötüshke chaqirdi. Shundaqla b d t kishilik hoquq kéngishining Uyghur élide yüz bériwatqanlarni ayaghlashturush we xitaygha bésim ishlitishte yüksek mejburiyiti barliqini eskertti.

Toluq bet