Хитай даирилири уйғур районида 80 миң адәмниң «кәспий техника мәктәплири» дә тәрбийә көрүватқанлиқини илгири сүрди

Мухбиримиз әркин
2018-09-10
Елхәт
Пикир
Share
Принт

Хитай таратқулириниң илгири сүрүшичә, нөвәттә уйғур районида 80 миң адәм райондики 98 «кәспий техника мәктәп» тә тәрбийә көрмәктә икән.

Мәзкур учурни уйғур аптоном районлуқ кәспий техника маарип бирләшмиси, намлиқ бир тәшкилат шинхуа агентлиқиға бәргән учурида ашкарилиған. Хәвәрдә баян қилинишичә, нөвәттә бу «кәспий техника мәктәплири» ниң көлими уйғур елиниң җәнубидики бир област 3 вилайәткә қарап давамлиқ кеңийиватқан болуп, униң нөвәттики «оқуғучи» сани хитайниң «12-5 йиллиқ пилани» мәзгилидикидин бир қатланған.

Мәзкур хәвәр хәлқара җәмийәтниң диққити уйғур районидики лагерларға буралған шундақла бәзи кишилик һоқуқ тәшкилатлири хитайниң уйғур районидики йиғивелиш лагерлирини «кәспий техника мәктипи» дәп пәрдазлап, бир милйондәк уйғурни бу лагерларда тутуп туруватқанлиқини илгири сүрүватқан мәзгилдә елан қилинди. Уйғур кишилик һоқуқ тәшкилатлириниң илгири сүрүшичә, хитай һөкүмити йиғивелиш лагерлириға «кәспий техника мәктипи» дәп түс беришидики мәқсити хәлқара җәмийәт тасадипий тәкшүрүш елип берип қалса, уларни алдаш икән.

Б д т ниң кишилик һоқуқ алий комиссари мишел баршелит дүшәнбә күни кишилик һоқуқ кеңишидә сөз қилип, уйғур районидики лагерлар мәсилисини тилға алған. У буниңға даир мәлуматларниң кишини «биарам қиливатқанлиқи» ни тәкитләп, хитайни б д т кишилик һоқуқ хадимлириниң тәкшүрүш елип беришиға йол қоюшқа чақирған иди.

Хитай һөкүмити илгири уйғур районидики лагерларни һәр хил намлар билән атап кәлгән. Әмма йеқинқи бир қанчә айдин бери хәлқара җәмийәтниң диққитини бу мәсилигә бурулушқа башлиғандин кейин у лагерларни «кәспий тәрбийәләш мәктипи» дегән намлар билән аташқа башлиған.

Б д т ирқий айримичилиқ комитетиниң бу йил 8‏-айда өткүзүлгән йиғинида хитай вәкили ху лйәнхе, уйғурларниң лагерларға қамалғанлиқини рәт қилип, бәзи уйғурларниң «кәспий тәрбийәләш» орунлирида дәм «алдурулуватқанлиқи вә өзгәртиливатқанлиқи» ни илгири сүргән. Уйғур аптоном районлуқ кәспий техника маарип бирләшмисиниң шинхуа агентлиқиға билдүрүшичә, 2017‏-йили бу кәспий техника мәктәпләр «200 миң қетим тәрбийәләш елип берип, ишқа орунлишиш нисбитини 97% гә йәткүзгән.»

Пикирләр (0)
Share
Толуқ бәт