Xitay da'iriliri Uyghur rayonida 80 ming ademning "Kespiy téxnika mektepliri" de terbiye körüwatqanliqini ilgiri sürdi

Muxbirimiz erkin
2018-09-10
Élxet
Pikir
Share
Print

Xitay taratqulirining ilgiri sürüshiche, nöwette Uyghur rayonida 80 ming adem rayondiki 98 "Kespiy téxnika mektep" te terbiye körmekte iken.

Mezkur uchurni Uyghur aptonom rayonluq kespiy téxnika ma'arip birleshmisi, namliq bir teshkilat shinxu'a agéntliqigha bergen uchurida ashkarilighan. Xewerde bayan qilinishiche, nöwette bu "Kespiy téxnika mektepliri" ning kölimi Uyghur élining jenubidiki bir oblast 3 wilayetke qarap dawamliq kéngiyiwatqan bolup, uning nöwettiki "Oqughuchi" sani xitayning "12-5 Yilliq pilani" mezgilidikidin bir qatlan'ghan.

Mezkur xewer xelq'ara jem'iyetning diqqiti Uyghur rayonidiki lagérlargha buralghan shundaqla bezi kishilik hoquq teshkilatliri xitayning Uyghur rayonidiki yighiwélish lagérlirini "Kespiy téxnika mektipi" dep perdazlap, bir milyondek Uyghurni bu lagérlarda tutup turuwatqanliqini ilgiri sürüwatqan mezgilde élan qilindi. Uyghur kishilik hoquq teshkilatlirining ilgiri sürüshiche, xitay hökümiti yighiwélish lagérlirigha "Kespiy téxnika mektipi" dep tüs bérishidiki meqsiti xelq'ara jem'iyet tasadipiy tekshürüsh élip bérip qalsa, ularni aldash iken.

B d t ning kishilik hoquq aliy komissari mishél barshélit düshenbe küni kishilik hoquq kéngishide söz qilip, Uyghur rayonidiki lagérlar mesilisini tilgha alghan. U buninggha da'ir melumatlarning kishini "Bi'aram qiliwatqanliqi" ni tekitlep, xitayni b d t kishilik hoquq xadimlirining tekshürüsh élip bérishigha yol qoyushqa chaqirghan idi.

Xitay hökümiti ilgiri Uyghur rayonidiki lagérlarni her xil namlar bilen atap kelgen. Emma yéqinqi bir qanche aydin béri xelq'ara jem'iyetning diqqitini bu mesilige burulushqa bashlighandin kéyin u lagérlarni "Kespiy terbiyelesh mektipi" dégen namlar bilen atashqa bashlighan.

B d t irqiy ayrimichiliq komitétining bu yil 8‏-ayda ötküzülgen yighinida xitay wekili xu lyenxé, Uyghurlarning lagérlargha qamalghanliqini ret qilip, bezi Uyghurlarning "Kespiy terbiyelesh" orunlirida dem "Alduruluwatqanliqi we özgertiliwatqanliqi" ni ilgiri sürgen. Uyghur aptonom rayonluq kespiy téxnika ma'arip birleshmisining shinxu'a agéntliqigha bildürüshiche, 2017‏-yili bu kespiy téxnika mektepler "200 Ming qétim terbiyelesh élip bérip, ishqa orunlishish nisbitini 97% ge yetküzgen."

Toluq bet