Нурлан абдумәнҗин: «кәспий техника тәрбийәләшни тәрәққий қилдуруш керәк»

Мухбиримиз әркин
2018-11-23
Елхәт
Пикир
Share
Принт

Уйғур аптоном районлуқ сиясий мәслиһәт кеңишиниң рәиси нурлан абдумәнҗин уйғур районида «кәспий техника тәрбийәләш мәркәзлири» ниң қанат яйдурулуши керәкликини билдүргән.

Униң 23‏-ноябир «тәңритағ» торида елан қилинған баянатида илгири сүрүшичә, уйғур аптоном районида «техника тәрбийәләш хизмити» ни қанат яйдуруш ши җинпиң ядролуқидики компартийәниң шинҗаңни башқуруш омумий пиланини әмәлийләштүрүп, бу районда узун муддәтлик әминлик бәрпа қилиш баш нишанини ишқа ашуруштики зор тәдбир икән. Нурлан абдумәнҗинниң мәзкур баянати хитай һөкүмитиниң районида бир милйондәк уйғурни «кәспий техника тәрбийәләш» намидики лагерларға қамивалғанлиқи хәлқара җәмийәтниң қаттиқ әйиблишигә учраватқан бир мәзгилдә елан қилинди.

Б д т да мушу айниң башлирида өткүзүлгән хитайниң кишилик һоқуқ вәзийитигә қарап чиқиш йиғинида америка, әнглийә, германийә, фирансийә қатарлиқ 16 дөләт хитайниң райондики аталмиш «кәспий техника тәрбийәләш мәркәзлири» ни дәрһал тақишини тәләп қилған иди. Арқидинла б д т кишилик һоқуқ кеңишиниң 6 мутәхәссиси ши җинпиңға хәт йезип, бу орунларниң хәлқара қанунларға хилап икәнликини билдүргән. Йеқинда йәнә 15 ғәрб дөлитиниң бейҗиңда турушлуқ баш әлчилири чен чүәнгоға хәт йезип, униң билән бу мәсилиләрни йүз туранә сөзлишишни тәләп қилған иди.

Нурлан абдумәнҗин баянатида йәнә «кәспий техника тәрбийәләш хизмити» ниң қанат яйдурулуши «террорлуқ һуҗумлирини тосуп, шинҗаң вәзийитиниң муқимлиқида ачқучлуқ рол ойнайдиғанлиқи, диний әсәбийликниң зәһәрлишигә учриған кишиләрни қутқузидиғанлиқи, намратлиқтин қутулушни алға сүридиғанлиқини илгири сүргән. Униң тәкитлишичә, «әмәлийәт шинҗаңдики кәспий техника тәрбийәләш мәркәзлириниң диний әсәбийликниң зәһәрлишигә учриған кишиләрниң нормал турмушқа қайтип келишни өгиниш вә иқтидарини җари қилдуруш орни икәнликини испатлиған» икән. Бирақ бу орунларда йетип чиққан гуваһчилар бу лагерларда «тутқунларниң диний етиқади, мәдәнийити, ана тили вә өрп адәтлиридин ваз кечишкә мәҗбурлинип, уларға қарита системилиқ меңә ююш елип берилидиғанлиқи, рәт қилғанларниң җисманий вә роһий җазаға учрайдиғанлиқи» ни билдүрмәктә.

Пикирләр (0)
Share
Толуқ бәт