Nurlan abdumenjin: "Kespiy téxnika terbiyeleshni tereqqiy qildurush kérek"

Muxbirimiz erkin
2018-11-23
Élxet
Pikir
Share
Print

Uyghur aptonom rayonluq siyasiy meslihet kéngishining re'isi nurlan abdumenjin Uyghur rayonida "Kespiy téxnika terbiyelesh merkezliri" ning qanat yaydurulushi kéreklikini bildürgen.

Uning 23‏-noyabir "Tengritagh" torida élan qilin'ghan bayanatida ilgiri sürüshiche, Uyghur aptonom rayonida "Téxnika terbiyelesh xizmiti" ni qanat yaydurush shi jinping yadroluqidiki kompartiyening shinjangni bashqurush omumiy pilanini emeliyleshtürüp, bu rayonda uzun muddetlik eminlik berpa qilish bash nishanini ishqa ashurushtiki zor tedbir iken. Nurlan abdumenjinning mezkur bayanati xitay hökümitining rayonida bir milyondek Uyghurni "Kespiy téxnika terbiyelesh" namidiki lagérlargha qamiwalghanliqi xelq'ara jem'iyetning qattiq eyiblishige uchrawatqan bir mezgilde élan qilindi.

B d t da mushu ayning bashlirida ötküzülgen xitayning kishilik hoquq weziyitige qarap chiqish yighinida amérika, en'gliye, gérmaniye, firansiye qatarliq 16 dölet xitayning rayondiki atalmish "Kespiy téxnika terbiyelesh merkezliri" ni derhal taqishini telep qilghan idi. Arqidinla b d t kishilik hoquq kéngishining 6 mutexessisi shi jinpinggha xet yézip, bu orunlarning xelq'ara qanunlargha xilap ikenlikini bildürgen. Yéqinda yene 15 gherb dölitining béyjingda turushluq bash elchiliri chén chüen'gogha xet yézip, uning bilen bu mesililerni yüz turane sözlishishni telep qilghan idi.

Nurlan abdumenjin bayanatida yene "Kespiy téxnika terbiyelesh xizmiti" ning qanat yaydurulushi "Térrorluq hujumlirini tosup, shinjang weziyitining muqimliqida achquchluq rol oynaydighanliqi, diniy esebiylikning zeherlishige uchrighan kishilerni qutquzidighanliqi, namratliqtin qutulushni algha süridighanliqini ilgiri sürgen. Uning tekitlishiche, "Emeliyet shinjangdiki kespiy téxnika terbiyelesh merkezlirining diniy esebiylikning zeherlishige uchrighan kishilerning normal turmushqa qaytip kélishni öginish we iqtidarini jari qildurush orni ikenlikini ispatlighan" iken. Biraq bu orunlarda yétip chiqqan guwahchilar bu lagérlarda "Tutqunlarning diniy étiqadi, medeniyiti, ana tili we örp adetliridin waz kéchishke mejburlinip, ulargha qarita sistémiliq ménge yuyush élip bérilidighanliqi, ret qilghanlarning jismaniy we rohiy jazagha uchraydighanliqi" ni bildürmekte.

Toluq bet