Aqchi nahiyeside 25-féwral küni 5.8 Bal yer tewrigen

Washin'gtondin muxbirimiz erkin teyyarlidi
2024.02.26

‍Uyghur diyarining aqchi nahiyeside 25-féwral küni sa'et 12 din 14 minut ‍ötkende yene yer tewrigen. Xitay taratqulirining bergen xewerliride qeyt qilinishiche, bu qétimliq yer tewreshning tewresh küchining 5.8 Bal ikenliki qeyt qilinmaqta. Xewerlerde, bu qétimliq yer tewreshning aqchi nahiyesidiki konkrét qaysi jayda yüz bergenliki tilgha élinmighan, lékin yer tewresh ornining peqet shimaliy parallél 41.15 Gradus, sherqiy méridi'an 78.41 Gradusqa toghra kélidighanliqi bildürülgen. Melum bolushiche, yer tewresh merkizi aqchi nahiye bazirigha 24 kilométir, uchturpan nahiyesige 68 kilométir kélidiken. “Xitay xewerliri” ning torining xewiride, peqet yer tewresh rayonida ahalilerning shalang jaylashqanliqi, emma uning yer tewresh merkizi etrapidiki rayonlarda küchlük hés qilin'ghanliqi tekitlen'gen.

Bu, uchturpan nahiyeside bu yil 1-ayning 23-küni yüz bergen 7.1 Bal yer tewreshtin buyanqi, eng küchlük yer tewreshlerning biri hésablinidu. Xitay hökümitining Uyghur diyarida yüz bergen tebi'iy apetlerge da'ir uchurlarnimu qattiq kontrol qilidighanliqi hemmige melum. Xitay hökümiti uchturpandiki ötken qétimliq yer tewreshke a'it uchurlarnimu qattiq kontrol qilip, ijtima'iy taratqulargha yer tewreshke da'ir uchurlarni yollighan kishilerni tutqun qilip, torda “Ösek söz” tarqitish bilen eyiblep jazalighan. Uchturpandiki yer tewreshning tepsilatidin xewerdar kishiler uchturpan'gha qarashliq yamansu yézisining yer tewreshte qattiq buzghunchiliqqa uchrighanliqini ilgiri sürgen bolsimu, lékin xitay hökümet taratqulirining xewerliride, yer tewreshte kélip chiqqan ziyan we buzghunchiliqqa a'it xewerler bérilmigen, peqet xitay da'irilirining jiddiy qutquzush élip bériliwatqanliqigha da'ir xewerlerni keng taratqanidi. “Xitay xewerliri” torining bildürüshiche, aqchi nahiyelik partkomning teshwiqat bölümidiki xadimlar aqchi nahiyesidiki yer tewreshning buzghunchiliq ehwali, yer tewreshte adem yarilinish we mal-mülükning ziyan'gha uchrash ehwaligha da'ir doklatni téxi tapshurup almighanliqi, konkrét ehwalning ilgirilep sürüshtürülüwatqanliqini éytqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.