“Yershari waqti géziti” gherb taratqulirini Uyghur élidiki lagérlar mesiliside heqiqetni burmilash bilen eyiblidi

Muxbirimiz irade
2019.03.21

Xitayning “Yershari waqti géziti” Uyghur élidiki lagérlar mesilisige yéqindin diqqet qiliwatqan gherb axbarat wasitilirige hujum qildi.

“Yershari waqti géziti” 20-mart künidiki sanida “Shinjang heqqidiki éytilmighan heqiqetler-gherb axbaratliri riyalliqni xewer qilishni ret qilmaqta” mawzusida bir parche maqale élan qilghan. Mezkur maqalide bir atalmish amérikaliq tor yazghuchisi, xitayning teshwiqat elchisi qurbanjan semet we yene bir türk zhurnalistlarning sözlirini neqil keltürüp, gherb axbarat wastilirining he désila Uyghur élidiki réyalliqni burmilawatqanliqini, ularning ishenchlik bolmighan xewer menbelirige tayinip xewer bériwatqanliqini ilgiri sürgen.

“Yershari waqti géziti” chet'ellerdiki kishilik hoquq organlirigha “Sherqiy türkistan” térrorchiliri we gherb hökümetliri pul béridighanliqi, shunga bu organlarning emeliyetni burmilaydighanliqini, ularning he désila Uyghur élidiki “Kespiy maharet bilen terbiyelesh orunliri” ni natséstlarning jaza lagérlirigha oxshitish arqiliq dunyada yaman tesir peyda qiliwatqanliqini bayan qilghan.

Mezkur maqalide yene qurbanjan semet bilen erkin önjan isimlik atalmish türk zhurnalist özlirining Uyghur mesiliside “Sherqiy türkistanchi” térrorchi küchlerdin perqliq köz qarashta bolghanliqi üchün amérikada we türkiyede tehditke uchrighanliqini ilgiri sürgen.

Chet'ellerdiki Uyghur közetküchilerning qarishiche, xitayning yuqiriqidek hujumgha ötüshi uning nöwette amérika qatarliq gherb démokratik ellirining we xelq'aradiki nopuzluq kishilik hoquq organlirining Uyghurlarning weziyitige köngül bölüwatqanliqidin qattiq bi'aram boluwatqanliqini ipadilep béridiken.

Xitay hökümiti yéqindin buyan Uyghur élide yolgha qoyghan siyasetlirining mahiyitini yoshurup qélish üchün teshwiqat heriketlirini keng qanat yaydurup, bir qatar déplomatlarni, muxbirlarni aldin yasap qoyulghan “Qayta terbiye merkezliri” ni ziyaretke orunlashturghan bolsimu, emma lagérlargha a'it emeliyetni yoshurup qalalmighan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.