Amérika sotining "Yida" mehsulatlirini ret qilish buyruqi éghir zerbe bolghan

Muxbirimiz eziz
2021-10-12
Share

Uyghur diyaridiki mejburiy emgekke chétishliq bolghanliqi üchün buninggha munasiwetlik bir qatar gherb shirketliri, jümlidin "Nayki" qatarliq bir qatar dangliq shirketlerni xam eshya bilen teminleydighan "Yida" (Esquel) guruhi amérika soda ministirliqining "Qara tizimliki" ge élin'ghanidi. Yéqinda bu shirketning özlirini bu tizimliktin chiqiriwétish heqqidiki erzi washin'gton fédéral sotida ret qilindi. Buning bilen xongkongni baza qilghan bu shirketning iqtisadiy asasi éghir tewrinishke duch kelgen.

"Menbeler zhurnili" ning 11-öktebirdiki mexsus xewiride éytilishiche, bash sotchi réggi walton bu heqte muxbirlargha söz qilip "Bu shirket özlirining shinjangdiki mejburiy emgekke baghlinishliq emeslikini ispatlap bérelmidi. Shuning üchün biz dewagerning erzini ret qilduq" dégen. Xewerde éytilishiche, mezkur erz ret qilin'ghanliqtin ularning ikki zawuti taqilish xewpige duch kelgen. Shundaqla bu zawutlardiki yette minggha yéqin ishchining xizmiti biwasite halda buning tesirige uchrighan. Zawutning bayanatchisi bu heqte söz qilip "Bizning héchqandaq ishlepchiqirish halqimiz mejburiy emgekke baghlinishliq emes. Biz qayta erz sunimiz" dégen.

Xewerde éytilishiche, amérika tamozhnisi "Qara tizimlik" ke ismi chüshken shirketlerning héchqandaq towarlirini chégradin kirgüzmeydighan bolup, shu qatarda "Yida" guruhining wéytnamdin ewetken bir yürüsh mallirimu tutup qélin'ghaniken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet