2000 Нәпәрдәк уйғур йеза яшлири пәйшәнбә күни шималда ишләш үчүн йолға чиққан

Мухбиримиз әркин
2017-06-16
Елхәт
Пикир
Share
Принт

Уйғур илиниң хотән, қәшқәр вилайәтлиридин тунҗи түркүмдики 2000 нәпәр уйғур йеза әмгәк күчи 15‏-июн пойизға олтуруп, хитайниң «шинҗаң җуңтәй гуруһи» ға қарашлиқ карханиларда вә уйғур илиниң шималий, шәрқий, корла қатарлиқ җайлиридики хитай карханилирида ишләш үчүн йолға чиққан.

Йеқинда уйғур аптоном районлуқ партком уйғур әмгәк күчлирини йөткәш хизмәт йиғини чақирип, қәшқәр вә хотән икки вилайәттин кәлгүси 3 йил ичидә 100 миң йеза әмгәк күчини шималға вә хитай өлкилиридики карханиларға йөткәп ишлитишни қарар қилған иди.

«Шинҗаң иқтисади гезити» ниң билдүрүшичә, пәйшәнбә күни йолға чиққан 2000 нәпәр уйғур ишләмчи кәлгүси 3 йил ичидә йөткилидиған 100 миң әмгәк күчиниң тунҗи түркүми болуп, даириләр мушу ай ичидә җәмий 8000 әмгәк күчи йөткәйдикән. Хитай һөкүмити илгири уйғур йеза әмгәк күчлирини нуқтилиқ хитай өлкилиридики карханиларға йөткәп кәлгән. Бирақ, униң бу пилани уйғур кишилик һоқуқ тәшкилатлириниң тәнқидигә учриған болуп, уйғур районида шунчә көп ишқа орунлишиш пурсити турса, уйғурларни немә үчүн ичкиригә йөткәйдиғанлиқи гуман қозғап кәлгән иди. 

Бирақ уйғур аптоном районлуқ парткомниң йеқинда ечилған йиғинида, хотән вә қәшқәр икки вилайәттики йеза әмгәк күчлириниң зор бир қисмини шималға йөткәш оттуриға қоюлған. Бу өзгиришкә қандақ амил сәвәб болғанлиқи мәлум әмәс. «Шинҗаң иқтисад гезити» ниң хәвиридә көрситишичә, даириләр 2‏-, 3‏- вә 4-түркүмдики әмгәк күчлирини19-июн, 23‏-июн вә 27‏-июнда йөткәйдикән.

Пикирләр (0)
Share
Толуқ бәт