2000 Neperdek Uyghur yéza yashliri peyshenbe küni shimalda ishlesh üchün yolgha chiqqan

Muxbirimiz erkin
2017-06-16
Élxet
Pikir
Share
Print

Uyghur ilining xoten, qeshqer wilayetliridin tunji türkümdiki 2000 neper Uyghur yéza emgek küchi 15‏-iyun poyizgha olturup, xitayning "Shinjang jungtey guruhi" gha qarashliq karxanilarda we Uyghur ilining shimaliy, sherqiy, korla qatarliq jayliridiki xitay karxanilirida ishlesh üchün yolgha chiqqan.

Yéqinda Uyghur aptonom rayonluq partkom Uyghur emgek küchlirini yötkesh xizmet yighini chaqirip, qeshqer we xoten ikki wilayettin kelgüsi 3 yil ichide 100 ming yéza emgek küchini shimalgha we xitay ölkiliridiki karxanilargha yötkep ishlitishni qarar qilghan idi.

"Shinjang iqtisadi géziti" ning bildürüshiche, peyshenbe küni yolgha chiqqan 2000 neper Uyghur ishlemchi kelgüsi 3 yil ichide yötkilidighan 100 ming emgek küchining tunji türkümi bolup, da'iriler mushu ay ichide jem'iy 8000 emgek küchi yötkeydiken. Xitay hökümiti ilgiri Uyghur yéza emgek küchlirini nuqtiliq xitay ölkiliridiki karxanilargha yötkep kelgen. Biraq, uning bu pilani Uyghur kishilik hoquq teshkilatlirining tenqidige uchrighan bolup, Uyghur rayonida shunche köp ishqa orunlishish pursiti tursa, Uyghurlarni néme üchün ichkirige yötkeydighanliqi guman qozghap kelgen idi. 

Biraq Uyghur aptonom rayonluq partkomning yéqinda échilghan yighinida, xoten we qeshqer ikki wilayettiki yéza emgek küchlirining zor bir qismini shimalgha yötkesh otturigha qoyulghan. Bu özgirishke qandaq amil seweb bolghanliqi melum emes. "Shinjang iqtisad géziti" ning xewiride körsitishiche, da'iriler 2‏-, 3‏- we 4-türkümdiki emgek küchlirini19-iyun, 23‏-iyun we 27‏-iyunda yötkeydiken.

Toluq bet