Йү җеңшиң, уйғур райониниң идеологийә саһәсидә тазилаш елип беришни тәкитлигән

Мухбиримиз әркин
2017-09-13
Елхәт
Пикир
Share
Принт

Хитай мәркизи комитети сиясий бюросиниң даимий әзаси, хитай сиясий кеңишиниң рәиси йү җиңшиң бейҗиңда өткүзүлгән уйғурларға алақидар бир йиғинда көрсәтмә берип, уйғур аптоном райониниң тарих, мәдәнийәт, милләт, дин қатарлиқ идеологийә саһәлиридә тазилаш елип беришни тәкитлигән.

Шинхуа агентлиқиниң хәвиридә ашкарилишичә, у, «шинҗаңниң тарих, мәдәнийәт, милләт, дин қатарлиқ җәһәтлиридики хата идийәләрниң тәсирини тазилап, узун вақитлардин бери мәвҗут болуп кәлгән көп қатламлиқ мәсилиләрни түп йилтизидин һәл қилиш керәк» дегән.

Йү җиңшиң бу сөзләрни чаршәнбә күни өткүзүлгән «шинҗаңдики бир қанчә тарихий мәсилиләр тәтқиқати сөһбәт йиғини»да қилған болуп, бу йиғинға компартийә мәркизи комитетидики бәзи муһим һоқуқдарларниң иштирак қилиши диққәт қозғиди.

Униңға мәркизи комитет «шинҗаң хизмитини маслаштуруш рәһбәрлик гурупписи»ниң муавин башлиқи җаң чүншйән, мәркизи комитет ишханисиниң башлиқи су җәншу, мәркизи бирликсәп бөлүминиң башлиқи сүн чүнлән, җ х министири гу шиңкүн, сиясий кеңәшниң муавин рәиси ду чиңлин, хитай дөләт кабинетиниң баш катипи яң җиң қатарлиқ әмәлдарлар қатнашқан. Йү җиңшиң компартийәниң «шинҗаң мәсилисидики түп нуқтиинәзирини шәрһләп, уйғур районидики тарих, мәдәнийәт, милләт вә дин мәсилиләргә җуңхуа миллити ортақ гәвдисидә туруп муамилә қилишни, уйғур аптоном райониниң идеологийә саһәсидики болупму тарих саһәсидики бәзи әмәлий мәсилиләрни мушу нуқтиинәзәрдә туруп һәл қилишни тәкитлигән.

Йиғинда сүн чүнлән сөз қилип, бу йиғин «шинҗаңдики бирқанчә тарихий мәсилигә болған нуқтиинәзәрни техиму айдиңлаштуруп, шинҗаңниң идеологийә саһәсидики хизмитини яхши ишләшни муһим асас билән тәминлиди,» дегән. Бирақ хитай ахбарати, чаршәнбә күнидики йиғинда «шинҗаңдики зади қайси бирқанчә тарихий мәсилә» ниң музакирә қилинғанлиқини тилға алмиған.

Йү җиңшиң юқириқи сөзләрни хитай һөкүмитиниң хәлқарада уйғурларни бастуруп, уларниң диний әркинликни боғуш, сиясий тәрбийиләш мәркәзлиригә уйғурларни йиғивелиш, ана тил маарипини чәкләп, мусулман уйғурларға хитай мәдәнийитини мәҗбури сиңдүрүшкә урунуш билән тәнқидлиниватқан мәзгилдә қилған.

Пикирләр (0)
Share
Толуқ бәт