Yünnen ölkisining sabiq partkom sékrétari ölüm jazasigha höküm qilindi

Yünnen ölkisining sabiq partkom sékrétari bey énpéy yekshenbe küni xénen ölkisining enyang sheherlik ottura sot mehkimisi teripidin ölüm jazasigha höküm qilinip, ikki yil kéchiktürüp ijra qilish békitilgen.

Radi'oyimizning xewer qilishiche, yünnen ölkilik partkomning sabiq sékrétari bey énpéy bu yil 69 yashqa kirgen bolup, u sotta özining 247 milyon yüen para yégenlikini étirap qilghan.

Bey énpéy, shi jinping chiriklikke zerbe bérish herikitini bashlighandin buyan ölümge höküm qilin'ghan eng yuqiri derijilik partiye rehberlirining biri bolup hésablinidu, xewerlerde uning xitay kompartiyisi siyasiy qanun komitéti sabiq sékrétari jow yongkang bilen zich munasiwetlik ikenliki körsitilgen.

Amérika awazining xewer qilishiche, bey énpéy yünnende partkom sékrétarliq wezipisi öteshtin ilgiri chingxey ölkilik partkomning partkom sékrétari, memliketlik, xelq qurultiyi muhit we bayliqlarni qoghdash komitétining mu'awin mudiri qatarliq wezipilerni aqturghan bolup, uning tekshürüsh jeryanida pash qilishiche, jow yongkang uningdin oghli jow binning bir qoghushun - sinik kanining sétiwélish ishlirigha arilishishigha köngül bölüshini telep qilghan iken.

Sot hökümide yene uning kéchiktürüp ijra qilish waqti toshqandin kéyin, uninggha chiqirilghan ölüm jazasining muddetsiz qamaq jazasigha özgertilidighanliqi, uningdin kéyin, uning jinayitining yéniklitilmeydighanliqi we yaki qoyup bérilmeydighanliqi bildürülgen.

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar