Uyghur rayonidiki yuqiri sür'etlik tashyolning 3-liniyeside qatnash bashlan'ghan

Muxbirimiz jewlan
2022.08.31
Share on WhatsApp
Share on WhatsApp

“Xitay xewerliri tori” ning 31-awghust künidiki xewirige qarighanda, Uyghur rayonigha kirip-chiqidighan yuqiri sür'etlik tashyolning 3-liniyesi bolghan yétimbulaq-chaqiliq yuqiri sür'etlik tashyolida 30-awghust küni qatnash bashlan'ghan. Buning bilen, Uyghur rayonidiki yuqiri sür'etlik tashyolning omumiy uzunluqi 7500 kilométirdin éship ketken.

Yétimbulaq-chaqiliq yuqiri sür'etlik tashyoli Uyghur rayonining sherqiy jenubidiki muhim qatnash yolliridin birige aylan'ghan bolup, jenubta chingxey bilen chégralinidighan chaqiliq nahiyesining yétimbulaq (yaki chilanbulaq) baziridin bashlinip, shimalda chaqiliq nahiye bazirigha tutishidiken. Bu yol lyenyün'gang-qorghas yuqiri sür'etlik tashyoli, béyjing-ürümchi yuqiri sür'etlik tashyolidin qalsa, Uyghur rayonigha kirip-chiqidighan 3-yuqiri sür'etlik tashyol liniyesi hésablinidiken.

Xewerde éytilishiche, xitay hökümiti uzunluqi 294 kilométir kélidighan bu yolni yasash üchün 14 milyard 409 milyon yüen serp qilghan bolup, bu yolda qatnash bashlan'ghandin kéyin ichkiri xitaydin kélidighan mashinilar biwasite cherchen, chaqiliq, xoten, qeshqerge kireleydiken.

Xitay hökümiti “Shinjanggha kirip-chiqishni tézleshtürüsh, shinjangning ichki yolini tutashturush, jenub-shimal otturisini rawanlashturush, chégradin kirip-chiqishni baghlashturush” qurulushigha köplep meblegh séliwatqan bolup, bu rayonni “Bir belwagh bir yol” liniyesidiki muhim iqtisad tügünige aylandurush we bu rayon'gha ichkiridin köplep adem we meblegh kirgüzüsh shara'itini hazirlimaqchi bolghan. Emma xitayning iqtisadi chékiniwatqan, yuqum weziyiti éghirlishiwatqan ehwalda xitayning u pilanni ishqa ashuralmasliq éhtimalimu kücheymektiken. Washin'gton shehiridiki “Tutash asiya” aqillar merkizining tetqiqatchisi xilman bu heqte söz qilip: “Méningche, ‛bir belwagh bir yol‚ qurulushi déngizda ölüp qalmasliqi mumkin. Emma uning quruqluqta nege baralishi bekmu gumanliq” dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.