Istanbulda suyiqestke uchrighan yüsüpjan emetning délosigha alaqidar ikki gumandar qolgha élin'ghan

Muxbirimiz irade
2020-11-26
Share

Türkiye anatoliye agéntliqining 26-noyabir tarqatqan xewerge qarighanda, istanbul saqchi da'iriliri istanbulning awjilar rayonidiki dénizköshkler mehelliside qoralliq hujumgha uchrap éghir yarilan'ghan yüsüpjan emetning délosigha munasiwetlik tekshürüsh netijiside 11-noyabir küni 29 yashliq ezerbeyjanliq t. Aliyéfni qolgha alghan. U soraqqa tartilghanda, özining yüsüpjan bilen élim-bérim mesilisi barliqini, shunga uninggha qoralliq hujum qilghanliqini ilgiri sürgen. Halbuki, yüsüpjan emet eyni chaghda radiyomizgha qilghan sözide, özining péyige chüshken bu kishini tonumaydighanliqini we héchkim bilen héchqandaq ziddiyiti yoqliqini bildürgen idi.

Melum bolushiche, soraqtin kéyin, gumandar t. Eliyéfning délosi edliye orunlirigha ewetilip, resmiy qolgha élin'ghan.

Eyni waqittiki hujum jeryanini süretke alghan jinayet gumandarliridin i. Ömer 20-noyabir küni saqchigha teslim bolghan bolup, uningmu délosi edliyege ewetilgendin kéyin, qolgha élin'ghan.

Jinayet gumandari t. Eliyéf istanbulning küchük chekmeje rayonidiki öyide tutqun qilinish jeryanigha a'it sin körünüshliri türkiyediki axbaratlarda élan qilindi.

Yüsüpjan emet 2-noyabir istanbul waqti kech sa'et 11 etrapida qoralliq hujumgha uchrap éghir yarilan'ghanidi. Yüsüpjan emet xelq'araliq axbarat wasitilirigha özining burun xitay jasusluq organliri üchün xizmet qilishqa mejburlan'ghanliqini ashkarilighan bolup, u bu seweblik xitay dölet xewpsizliki organliri teripidin tehditke uchrap kelgenlikini éytqan. Yüsüpjan emet uchrighan qoralliq hujumda qoli we dolisdin oq yégen bolup, u hazir jiddiy dawalanmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet