Xitay yüz tonush téxnikisini haywanlarghimu ishlitishke bashlighan

Yüz tonush téxnikisini Uyghur diyarida sinaq qilip, Uyghurlarni teqib qilishta keng kölemlik ishlitiwatqan xitay, nöwette mezkur téxnikini haywanlarghimu ishlitishke bashlighan. “Washin'gton pochtisi” gézitining 24-awghust xewer qilishiche, béyjingdiki “Yunitréys téxnologiye shirkiti” ning qurghuchisi jaw jinshi yüz tonush téxnikisining yéza igilik ishlirida qollinilip, qoy, choshqa, kala qatarliq haywanlargha ishlitilishke bashlighanliqini bildürgen. Lékin uning tekitlishiche, bu téxnikida “Choshqini perqlendürmek qiyin iken”.

U “Choshqilarning hemmisi bir-birige oxshaydu. Emma sütlük kalilar ( inekler) buninggha oxshimaydu. Ular qara we aq kélidu, turqimu perqliq” dégen. “Washin'gton pochtisi” gézitining xewiride, xitayning yüz tonush téxnikisi dunyaning aldinqi qatarda turidighanliqi, uning mezkur téxnikini bixeterlik üchün ishlitipla qalmay, siyasiy öktichilerni we az sanliq milletlerni teqib qilish üchünmu ishlitip kelgenliki, shunga amérika maliye ministirliqi xitaydiki “Méngwi shirkiti” ni xitay hökümitining Uyghurlarni basturushigha hemkarlashqanliqi üchün “Qara tizimlik” ke kirgüzgenlikini bildürgen.

Xewerde tekitlinishiche, “Unitréys téxnika shirkiti” ning mes'uli jaw jinshi yüz tonush téxnikisi arqiliq her bir haywanning herikitini közütüp turalaydighanliqi, her bir kalining qanchilik uzun su ichidighanliqi, qanchilik yem yeydighanliqi dégendek heriketlirini közetelydighanliqini tekitligen. Közetküchiler ilgiri xitay shirketlirining Uyghur diyarini özining nazaret téxnikisini sinaq qilidighan sinaq meydanigha aylanduruwalghanliqi, uning kéyinrek bu téxnikini bashqa sahelerge kéngeytidighanliqini tekitlep kelgen.