Jang chünshyen yéngi yilliq nutqida atalmish "Diniy ashqunlargha zerbe bérish" atalghusini eng köp tilgha alghan

Muxbirimiz jüme
2015-01-01
Share

Uyghur aptonom rayonining birinchi qol bashliqi jang chünshyen 31- dékabir élan qilghan yéngi yilliq nutqida "Muqimliqni saqlash" we atalmish "Diniy ashqunlargha zerbe bérish" atalghusini eng köp tilgha alghan.

"Tengritagh" torining xewer qilishiche, jang chünshyen 31- dékabir ürümchide chaqirilghan yéngi yilni tebriklesh chay ziyapitide "2014- Yilining körüshke tolghan", "Xelq'ara weziyette özgirish köp bolghan", atalmish "Térrorluq weqeliri köp körülgen, üch xil küchlerning teshwiqiy qutratquluq we qoralliq arilishishi kücheygen bir yil" bolghanliqini bildürgen.

Jang chüshen nutqida 2014- yilliq xizmetlirining xulasisi süpitide ötken bir yil jeryanida "Térrorluq, zorawanliqi weqelirini qattiq basturushni kücheytish üchün mexsus heriketler élip bérilghanliqi" ni hemde shuninggha a'it délolirining "Qet'iy we keskin" bir terep qilin'ghanliqini ashkarilighan.

U yene, pütün rayon miqyasining muqim weziyitini saqlash üchün "Zerbe béridighan qol qattiq bolush, edepleydighan qol téximu qattiq bolush" haliti saqlap kélin'genliki, atalmish diniy ashqunlishish qatarliqlargha qattiq zer bérish üchün "Diniy ishlar nizamnamisi" ning özgertilgenliki, "Jihad" nezeriyisige taqabil turulghanliqini bildürgen.

U 2015- yilida yuqiriqi xizmet prinsipining özgermeydighanliqidin shepe bergendin bashqa, bu yilda "Iqtisadiy tereqqiyat arqiliq jem'iyet muqimliqini qolgha keltürüsh" méxanizmini kücheytilidighanliqini tekitligen.

Iqtisadiy igilikni ilgiri sürüp, Uyghur élining muqimliqini kapaletke ige qilish pikri 2009- yildiki "5- Iyul ürümchi weqesi" din kéyin qayta tekitlen'gen we kücheytip yolgha qoyulushqa bashlighan siyasetlerning biri.

Halbuki, bu heqte pikr yürgüzgen mutexessisler, mezkur iqtisadiy tereqqiyat méwisidin yerlik Uyghurlarning yenila sirtta qaldurulidighanliqi, buning Uyghur élidiki tengsizlikni téximu ulghaytidighan amillarning birige aylinidighanliqini agahlandurghan.

Ularning qarishiche, Uyghurlarning tili, dini we milliy medeniyiti hessilep cheklesh obyékti qiliniwatqan peytlerde noqul iqtisadiy tereqqiyatnila tekitlesh Uyghurlarning naraziliqigha seweb boluwatqan mewjut mesililerge jawab bolalmaydiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet