Мәшһур сәнәткар зикри әлпәттаниң қизи ханқиз зикри лагерда хамушлуқ кесилигә гириптар болған

Мухбиримиз әзиз
2019-03-20
Елхәт
Пикир
Share
Принт

Уйғур хәлқиниң өткән әсирдә өткән мәшһур сазәндиси зикри әлпәттаниң қизи, уйғур аптоном районлуқ музейниң чүшәндүргүчиси 64 яшлиқ ханқиз зикри бир йилдин ашқан лагер һаяти сәвәблик нервиси аҗизлишип, хамушлуқ кесилигә гириптар болған.

Үрүмчидики хитай сақчилири ханқиз зикриниң аилә тавабиатиға униң лагерда бирқанчә айдин бери гәп қилмас болуп қалғанлиқи вә күн бойи торусқа қарап олтуридиғанлиқини мәлум қилған. Мәлум болушичә, ханқиз зикри өткән йили февралда лагерға елип кетилгәндә саламәтликидә һечқандақ бир мәсилә йоқ болуп, униң аилә-тавабиатлири нөвәттә ханқиз зикриниң лагерда җисманий вә роһий җәһәттин еғир қийин-қистаққа дуч кәлгәнлик еһтималлиқини илгири сүрмәктә.

Мухбиримиз гүлҗеһрәниң кичик аписи болған ханқиз зикри һәққидә бүгүн хәлқара кәчүрүм тәшкилати бир баянат елан қилип, хитай даирилирини ханқиз зикрини тездин давалашқа, шәртсиз қоюп беришкә яки адвокат арқилиқ өзини ақлашқа пурсәт беришкә чақирди. Мәзкур тәшкилат баянатида йәнә бу чақириққа аваз қошқучиларни уйғур районлуқ парткомниң секретари чен чүәнгоға имзалиқ мәктуп йоллашқа дәвәт қилди.

Уйғур аптоном районлуқ музейниң һазир җаваб вә тәҗрибилик чүшәндүргүчиси ханқиз зикри мухбиримиз гүлчеһрәниң тутқундики 23 нәпәр уруқ-туғқинидин биридур. Хитайниң нөвәттики әң сәзгүр дөләт мәхпийәтлики болған лагерлар һәққидә хәвәр ишлигәнлики үчүн радийомиз уйғур бөлүмидики 6 нәпәр мухбирниң уйғур районидики 40 тин артуқ аилә әзалири 2017 ‏-йилиниң оттурилиридин башлап тутқун қилинған болуп, һазирғичә қоюп берилмиди.

Пикирләр (0)
Share
Толуқ бәт