Meshhur sen'etkar zikri elpettaning qizi xanqiz zikri lagérda xamushluq késilige giriptar bolghan

Muxbirimiz eziz
2019-03-20
Élxet
Pikir
Share
Print

Uyghur xelqining ötken esirde ötken meshhur sazendisi zikri elpettaning qizi, Uyghur aptonom rayonluq muzéyning chüshendürgüchisi 64 yashliq xanqiz zikri bir yildin ashqan lagér hayati seweblik nérwisi ajizliship, xamushluq késilige giriptar bolghan.

Ürümchidiki xitay saqchiliri xanqiz zikrining a'ile tawabi'atigha uning lagérda birqanche aydin béri gep qilmas bolup qalghanliqi we kün boyi torusqa qarap olturidighanliqini melum qilghan. Melum bolushiche, xanqiz zikri ötken yili féwralda lagérgha élip kétilgende salametlikide héchqandaq bir mesile yoq bolup, uning a'ile-tawabi'atliri nöwette xanqiz zikrining lagérda jismaniy we rohiy jehettin éghir qiyin-qistaqqa duch kelgenlik éhtimalliqini ilgiri sürmekte.

Muxbirimiz güljéhrening kichik apisi bolghan xanqiz zikri heqqide bügün xelq'ara kechürüm teshkilati bir bayanat élan qilip, xitay da'irilirini xanqiz zikrini tézdin dawalashqa, shertsiz qoyup bérishke yaki adwokat arqiliq özini aqlashqa purset bérishke chaqirdi. Mezkur teshkilat bayanatida yene bu chaqiriqqa awaz qoshquchilarni Uyghur rayonluq partkomning sékrétari chén chüen'gogha imzaliq mektup yollashqa dewet qildi.

Uyghur aptonom rayonluq muzéyning hazir jawab we tejribilik chüshendürgüchisi xanqiz zikri muxbirimiz gülchéhrening tutqundiki 23 neper uruq-tughqinidin biridur. Xitayning nöwettiki eng sezgür dölet mexpiyetliki bolghan lagérlar heqqide xewer ishligenliki üchün radiyomiz Uyghur bölümidiki 6 neper muxbirning Uyghur rayonidiki 40 tin artuq a'ile ezaliri 2017 ‏-yilining otturiliridin bashlap tutqun qilin'ghan bolup, hazirghiche qoyup bérilmidi.

Toluq bet