Зимбабовидики һәрбий өзгириштин кейин президент мугаби нәзәрбәндкә елинди

Мухбиримиз ирадә
2017-11-16
Елхәт
Пикир
Share
Принт

Б б с қатарлиқ агентлиқларниң хәвәр қилишичә, зимбабовида йүз бәргән һәрбий өзгириш нәтиҗисидә узун йиллардин бери һоқуқ тутуп келиватқан президент роберт мугабе чаршәнбә күни өз өйидә нәзәрбәнд астиға елинған.

Һәрбий өзгиришниң рәһбири морген сивангирайи ахбаратларға қилған сөзидә бу йил 93 яшқа киргән президент мугабиниң дәрһал истепа бериши керәкликини билдүргән. Бирақ хәвәрләрдин қариғанда, мугаби буни рәт қиливатқан болуп, униң нөвәттә бир қисим армийә башлиқлири вә җәнубий африқидин кәлгән бир һәйәт билән өз тәқдири үстидә сөһбәтлишиватқанлиқи мәлум.

Бу һәқтики бүгүнки хәвәрләрдә йәнә зимбабовида йүз бәргән һәрбий өзгириштә хитайниң қоли барлиқи ишарәт қилинмақта. Бу пикирни әң аввал «лондон вақти гезити» оттуриға қойған болуп, у сәйшәнбә күни тарқатқан хәвиридә һәрбий өзгириш рәһбәрлиридин бири болған генерал константини чивәнганиң өткән җүмә күни хитайға берип, хитай дөләт мудапиә министири чаң вәнчүн билән көрүшкәнликини вә хитайдин һәрбий өзгиришкә қарита мақуллуқ алғанлиқини илгири сүргән.

«Тәқдир» гезитиниң бу һәқтики баянлиридин қариғанда, хитайниң зимбабовида нурғун мәблиғи бар болуп, юқиридики вәқә хитайниң чәтәлләргә селиватқан зор мәблиғи вә сода алақилириниң сиясий тәсиргә айлиниватқанлиқиға бир яхши мисали болалайдикән.

«Вақит» гезити өз хәвиридә йәнә зимбабовиниң һөкүмәт қатлимидики қаттиқ чириклик сәвәбидин хитайниң һәрбий өзгириш йүз беришигә иҗабий позитсийәдә болуп кәлгәнликини баян қилған.

Хәвәрләрдин мәлум болушичә, зимбабовидики һакимийәт өзгиришиниң қандақ нәтиҗә беридиүанлиқи ениқсиз икән. Бирақ көзәткүчиләрниң қаришичә, мугабиниң һоқуқни қайта қолға елиш еһтималлиқиниму чәткә қеқишқа болмайдикән.

Пикирләр (0)
Share
Толуқ бәт