"Zimistan" tori: "Musulmanlar rayonidiki muqimliq sewdasi tijaretchilerge éghir ziyan salghan"

Muxbirimiz erkin
2018-11-26
Élxet
Pikir
Share
Print

Xitay hökümiti 2017‏-yildin bashlap "Diniy ashqunluq" ni tazilap, "Muqimliqni qoghdash" namida diniy kitab, diniy buyumlarni, diniy belge, diniy isim we diniy kelimilerni téximu qattiq cheklep, halal markisi chaplan'ghan yémek-ichmek we bashqa istémal buyumlirini omumyüzlük men'i qilghan idi.

Chet'eldiki "Zimistan" namliq dini erkinlik torining bildürüshiche, xitay da'irilirining Uyghur rayonidiki bu xil muqimliq sewdasi külkilik derijige bérip yétip, tijaretchilerge éghir ziyan salghan. Nurghun dukandarlar bu xil mehsulatlarni yighiwétishke mejbur bolghan. Bezi dukanlar mehsulatini zawutqa qayturalmay éghir iqtisadi ziyan'gha uchrighan. Bezi dukanlargha éghir jerimane qoyulghan.

Bezilirining méli musadire qilinip taqilishqa mejbur bolghan. "Zimistan" torining 23‏-noyabir tarqatqan bu heqtiki xewiride, korlidiki jang famililik bir xitay dukandar ayalning sözi neqil keltürülgen bolup, u bazar bashqurush tarmaqlirining "Islam bilen kichikkine alaqisi bar birer buyumni tépiwalsa, derhal musadire qilidighanliqi" ni bildürgen. Xewerde yene qarimaydiki bir dukandarning ay yultuz shekillik bir jüp halqa seweblik weyran bolghanliqi ilgiri sürülgen.

Dukandarning "Zimistan" torigha bildürüshiche, bu yil 4‏-ayda yerlik bazar bashqurush tarmaqliri uning dukinida tekshürüsh élip bérip, ay-yultuz shekillik bir jüp halqini tépiwalghan. Da'iriler buning "Halal" buyumlar türige kiridighanliqini ilgiri sürüp, halqini musadire qilghan we dukanni péchetligen. Mezkur dukandar "Zimistan" torigha qilghan sözide, "Bu halqining bahasi 100 somdin sel artuqraqti. Uning üstige bu bir zinnet buyumi, uning térrorluq teshkilati bilen néme alaqisi bolsun" dégen.

Xewerde ashkarilinishiche, bu yil 9‏-ayda shixenzidiki bir tunggan réstorani pichaq, qingghiraqlirigha 2 reqemlik kod urghuzmighanliqi üchün jerimane yep taqilip qalghan. Xewerde, bu siyasetning dukandarlar bilen cheklinip qalmaydighanliqi, musulmanlarning öyidiki tömür eswablarghimu ikki reqemlik kod urghuzushi telep qilinidighanliqi, saqchilarning herqandaq waqitta ularning öyige üssüp kirip, bu eswablarni tekshürüshke hoquqluq ikenliki bildürülgen.

Toluq bet