Алматада зия сәмидигә аит йеңи китаб нәшир қилинди

Мухбиримиз үмидвар
2016-07-10
Share

Йеқинда қазақистандики “мир” нәширияти уйғур һазирқи заман әдәбиятиниң йирик намайәнидилиридин бири, мәшһур тарихи роман язғучиси вә 20 - әсир уйғур сиясий тарихи шаһидлириниң бири сүпитидә уйғурлар тәрипидин юқири баһаланған мәрһум зия сәмидиниң һаят паалийәтлиригә беғишланған “мәзкур вәқәләрниң тирик гуваһчиси” мавзулуқ бир китабни нәшир қилди.

Бу китабниң аптори зия сәмидиниң қизи белиқиз сәмиди болуп, у өз атисиға аит көплигән хатириләрни вә сүрәтләрни топлиған икән.

Уйғур авази гезитиниң хәвәр қилишичә, мәзкур китабқа зия сәмидиниң күндилик хатирисидики һазирғичә һечқандақ мәтбуатларда техичә елан қилинмиған бир қисим хатирилири вә язғучиниң замандашлириниң зия сәмиди һәққидә һәр хил йиллири язған мақалилири вә әдиб билән өткүзүлгән сөһбәт хатирилири, шеирлар һәм униң пәрзәнтлириниң әслимилири киргүзүлгән.

Зия сәмидиниң “йиллар сири”, “майимхан”, “әхмәт әпәнди” қатарлиқ тарихи романлиридин башқа йәнә “истәк вә қисмәт” мавзулуқ әслимисиму елан қилинған иди.

Зия сәмәди 1914 - йили туғулуп 2000 - йили, алматада вапат болған. У 1944 - 1949 - йиллардики миллий азадлиқ инқилаб қанашқучиси вә миллий армийә полковники болған, у, 1950 - йилларда - уйғур аптоном райони мәдәнийәт назири, әдәбият - сәнәтчиләр бирләшмиси рәиси болған вә 1958 - йили “йәрлик милләтчи” лик билән әйиблинип җазаланған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт