Zulhayat isma'il xitayning partiye qurultiyida uning “Shinjang siyasiti” ni yene aqlidi

Xitayning Uyghurlargha qarita élip barghan irqiy qirghinchiliqini aqlashta aktip rol élip kéliwatqan qeshqer uniwérsitétining mu'awin mudiri zulhayat isma'il, xitay kompartiyesining 16-‍öktebir béyjingda bashlan'ghan 20-qurultiyining aldida xitay taratqulirigha söz qilip, xitayning “Shinjang siyasitini yene aqlighan. Uning éytishiche, “Shinjangdiki her millet ammisi bixeterlik, muqimliq, tereqqiyat we ilgirileshtin ibaret bextlik turmushtin behrimen bolmaqta” iken.

Nöwette, qeshqer uniwérsitétining mu'awin mudiri, mektep partkomining mu'awin sékrétari qatarliq wezipilerge östürülgen zulhayat isma'il, yéqinqi bir qanche yildin béri b d t kishilik hoquq kéngishide xitayning Uyghurlargha qarita yürgüzgen irqiy qirghinchiliqini aqlap, xitayning jawabkarliqqa tartilishini tosushta awan'gartliq rol oynawatqan shexslerdin biri bolup qalghan.

U bu ayning bashliri xitay wekiller ömikining terkibide b d t kishilik hoquq kéngishining 51-qétimliq yighinigha qatniship, yighin jeryanida amérika, en'gliye qatarliq döletler sun'ghan Uyghur mesilisini kishilik hoquq kéngishide muzakire qilish toghrisidiki teklip layihesining ret qilinishi üchün pa'aliyet qilghan. Xitay merkizi téléwiziye istansisining xewer qilishiche, zulhayat isma'il axbarat yighinida mundaq dégen: “Ötken on yilda, shinjang rayonining yilliq omumi ishlepchiqirishi bir hesse ashti.

Kishi béshigha toghra kélidighan otturiche kirimi bir hessidin köprek éship, tarixtiki eng yuqiri rékortni yaratti.” lékin u sözide lagérlar, mejburiy emgek, rayondiki xitaylashturush herikiti, ghayib bolghan Uyghurlarning iz-dérikige da'ir mesililerni tilgha almighan. Biraq u xitayning “Dölet tereqqiyat istratégiyesi ichki quruqluq bolushtin sirtqa échiwétilgen aldinqi sepke aylandurghanliqi”, uning “Bir yol bir belwaghdiki muhim eshya oborot merkizi we ixtisasliqlarni teqsimlesh merkizige aylan'ghanliqi” ni ilgiri sürgen.

Xitay kompartiyesining 16-öktebir bashlan'ghan 20-qurultiyida shi jinping doklat bérip, xitayning kelgüsi besh yilliq pilanini sherhligen. U, xitayning qet'iy istratégiyelik iradini saqlap, jenggiwarliqini namayan qilghanliqi, uning zamaniwilishishi insaniyetke tereqqiyat modéli sun'ghanliqi, yuqumgha taqabil turushta, iqtisadiy we ijtima'iy tereqqiyatta ilham béridighan muweppeqiyetlerge érishkenlikini bildürgen. U yene xitayning teywen, xongkong mesililiridiki siyasitini sherhligen bolsimu, emma gherb elliri teripidin irqiy qirghinchiliq, dep eyiblen'gen halqiliq mesililerdin “Shinjang siyasiti” ni tilgha almighan.