Haway uniwérsitéti tutqundiki zulpiqar barat özbashning teqdiridin endishe qilmaqta
2019.06.26
25-Iyun haway uniwérsitétining oqutquchi we oqughuchilar wekilliri birlikte haway uniwérsitétida jem'iyetshunasliq kespi boyiche doktorluq unwanigha érishken zulpiqar barat özbashning teqdiridin endishe qilip, bir bash maqale élan qildi.
“Cholpan élanchiliqi” (Star Advertiser) torining shu künidiki sanigha bésilghan bash maqalide zulpiqar barat özbashning haway uniwérsitétida doktorluq unwani alghan xitaydiki tunji Uyghur jem'iyetshunas ikenliki alahide tilgha élin'ghan. Maqalide yene u oqush püttürgendin kéyin shinjang uniwérsitétining uninggha dotséntliq unwani bilen xizmetke qobul qilish teklipi ewetkenliki, emma haway uniwérsitétidiki dostlirining uninggha xitaygha qaytmasliq heqqide köp xizmet ishligenliki, shundaq bolsimu uning yenila qaytip ketkenliki we uzaq ötmey tutqun qilin'ghanliqi bayan qilin'ghan.
Maqalide éytilishiche, zulpiqar barat haway uniwérsitétining jem'iyetshunasliq fakultétida Uyghurlarning milliy kimliki heqqide doklat sözligende öz ismining xitayche pinyin sheklini qet'iy ret qilidighanliqini alahide eskertken iken. U doktorluq dissértatsiyeside yene 1944-yilidiki ili inqilabi we ikkinchi qétimliq sherqiy türkistan jumhuriyitige munasiwetlik bezi bayanlarni tonushturup ötken iken.
Maqalide xitay hökümitining nöwette Uyghur diyarida yürgüzüwatqan Uyghur milliy kimlikini yoqitish urunushlirida Uyghur ziyaliyliri we ilim ademlirining asasliq zerbe bérish nishanigha aylan'ghanliqi, bu ehwalgha nisbeten dunyadiki pütkül ilim igilirining jiddiy inkas qayturushi kérekliki tekitlen'gen.
Maqalide haway uniwérsitétidiki barliq oqutquchi-oqughuchilar we fakultét xadimlirining zulpiqar barat özbash we uning a'ilisining nöwettiki ehwalidin qattiq endishe qiliwatqanliqi éytip ötülgen. Uningdin bashqa maqalide yene pikir erkinliki bilen ilim erkinlikining insaniyetning eng négizlik kishilik hoquqlirining biri ikenliki, dunyadiki barliq hökümetler we uniwérsitétlarning xitay hökümiti teripidin tutqun qilin'ghan yaki ghayib qiliwétilgen Uyghur ziyaliylirining uchurlirini sürüshtürüshi kérekliki ilgiri sürülgen.
Zulpiqar barat özbash 2009-yili haway uniwérsitétining jem'iyetshunasliq kespige doktorluq ilmiy unwani üchün oqushqa kirgen. U amérikadiki oqushini tamamlighandin kéyin ürümchige qaytip bir mezgil shinjang uniwérsitétida “Tengritagh alimi” dégen tür boyiche tekliplik tetqiqatchi bolup ishligen. Ürümchidiki Uyghur ziyaliyliri arisida “Ilim chéyi” pa'aliyiti teshkilligen we ijtima'iy taratqulardiki bir yürüsh léksiye we munaziriliri bilen diqqet qozghighan.