Әхмәтҗан қасими: һәр бир тәргән һәрип дүшмәнгә оқ болуп тәгсун!

Ихтиярий мухбиримиз ойған
2014.06.22
exmetjan-bash.jpg
Photo: RFA


Өткәнки әсирниң 40 - йиллири мәйданға кәлгән шәрқий түркистан җумһурийити мустәқиллиқ, азадлиқ вә баравәрлик идийилирини хәлқ аммиси арисида тәрғиб қилиш мәқситидә өз мәтбуатини раваҗландурушқа алаһидә көңүл бөлди. Болупму бу муһим ишқа һөкүмәт рәһбәрлириму йеқиндин арилашқан иди. Һазир алмата шәһиридә әнә шу гезит вә җурналларда хизмәт қилған кишиләрни учритишқа болиду. Шуларниң бири 87 яшлиқ вапахан иминһаҗи оғли қурбаноф һазир алмата шәһиридә истиқамәт қилмақта.

Вапахан қурбаноф зияритимизни қобул қилип, өз бешидин өткән кәчүрмишлирини оттуриға қойди.

У 1927 - йили қазақистанниң яркәнт шәһиридә туғулған болуп, ғулҗидики “үмид” мәктипидә 5 - синипни тамамлиған вә аиливи әһвалниң қийинчилиқи түпәйли 14 йешидин тартип мусабайефниң терә завутида ишләшкә башлиған. У үч вилайәт азадлиқ қозғилиңи һарписида кейин миллий армийә генерали болған зунун тейипофни икки қетим учратқанлиқини ейтип, мундақ деди:

1943 - Йили бизниң өйгә йеқин җайда сәрәңгә завути ечилип қалди. Шуниңда зунун ака йиғин ечип, бу адәм инқилаб болидиғанлиқини биләттикән. У, “мән кәткиливатимән. Орнумда миҗит мусабайеф болиду. Обдан ишләңлар, урушмаңлар, талашмаңлар!” деди. Мән зунун ака билән бир мәлилик. Кейин инқилаб башлинип кәтти. Бир - икки ай бекарға қалдуқ. Кейин әскәргә алғили турди. Мени әскәргә чақирди, амма бармидим. Гезитқа ишқа кирип кәттим. Бир аз наборшиклиқни өгәндим. Мени бөлүм башлиқи қилди. 1947 - Йили уйғур гезитидә аз дегәндә 20 бала ишләтти. Бу “инқилабий шәрқий түркистан” гезитиниң сиртида йәнә “алға” гезити, “иттипақ” журнали, “һәрбий низамнамә” бар. Зия сәмәди “һәрбий низамнамә” башлиқи иди.

Әхмәтҗан қасими яхши әмгики үчүн вә шәрқий түркистан җумһурийитиниң 3 йиллиқи мунасивити билән мәтбәә байрими күни, йәни 1947 - йилниң 17 - ноябиридә в. Қурбанофқа тәшәккүрнамә тапшурған. В. Қурбанофниң ейтип беришичә, гезитханиға кәлгән ә. Қасими мундақ дегән: “силәрниң иш еғир, мурәккәп иш. Бир тал тәргән һәрипиңлар дүшмәнгә бир тал оқ болуп тәгсун. Силәр келәчәк вәтәнниң игиси. Обдан ишләңлар. Рәхмәт.”

В. Қурбаноф 1949 - йилниң декабир ейида әхмәтҗан қасиминиң рәсими бесилған “тәқдирнамә” билән мукапатланған. У, 1963 - йили қазақистанға көчүп чиқип, һәр хил хизмәтләрдә ишлиди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.