"Xitayning 21-esirde Uyghur rayonida qurghan yighiwélish lagérliri" namliq ilmiy doklat élan qilindi

Muxbirimiz shöhret hoshur
2018-08-22
Élxet
Pikir
Share
Print

Xelq'araliq Uyghur kishilik hoquq we démokratiyeni ilgiri sürüsh jem'iyitining tor bétide aldinqi küni, 20‏-awghust küni "Xitayning 21-esirde Uyghur rayonida qurghan yighiwélish lagérliri" namliq bir ilmiy doklat élan qilindi.

Mezkur doklatning munderijisidin melum bolushiche, doklat "Uyghur rayoni heqqide sawat", "Chén chüen'goning qol astida", "Xitaydiki lagérlar", "Terbiyelep özgertish sistémisi", "Uyghur rayonidiki 21-esir lagérlirigha omumiy bir nezer" dégendek yigirme nechche bab we bölümdin teshkillen'gen.

34 Bettin teshkil tapqan we in'glizche teyyarlan'ghan bu doklatta bu lagérlarning shekil qurulmisi, ichki tüzümi, jaza obyékti qilin'ghanlarning terkibi we kimliki heqqide melumatlar bérilgendin bashqa yene bu lagérlarning türme bilen perqi we oxshashliqliri, bu lagérlarning rayon xaraktérlik we yershari xaraktérlik xewp-xetiri heqqidimu mezmunlar orun alghan.

Doklatning bash qismidiki tonushturushtin melum bolushiche, bu doklat dunya Uyghur qurultiyining aliy rehbiri rabiye qadir xanim teripidin teyinlen'gen bir ilmiy hey'et teripidin teyyarlan'ghan iken.

Lagérlarning sün'iy hemrah arqiliq tartilghan resimliri, lagérdiki tutqunlarning Uyghur rayonining herqaysi nahiye we sheherlerdiki texminiy sanimu tilgha élin'ghan bu doklatta Uyghur rayonida nöwette 3 milyondin artuq insanning lagérda ikenlik perizi otturigha qoyulghan. Doklat axirida lagérgha tekshürüsh guruppisi ewetish, lagérdikilerning salametlik ehwalni tézdin közdin köchürüsh, lagérlarni derhal taqash we alaqidar xitay emeldarlirini xelq'ara jazagha tartish qatarliq teklip we chaqiriqlar otturigha qoyulghan.

Melum bolushiche, bu doklat lagérlar heqqide muhajirettiki Uyghur teshkilatliri teripidin teyyarlan'ghan tunji we nisbeten chong hejimlik ilmiy doklat hésablinidiken.

Toluq bet