Nuri türkel “Dunyadiki tesiri küchlük 100 shexs” ning biri bolup tallandi

Muxbirimiz nur'iman
2020.09.23
Nury-Turkel-100-ning-biri.jpg Nuri türkel “Dunyadiki tesiri küchlük 100 shexs” ning biri bolup tallandi.
Photo: RFA

“Dewr” heptilik zhurnili 22-séntebir 2020-yilliq “Dunyadiki tesri küchlük 100 shexs” ni élan qildi. Amérikaliq Uyghur adwokat, amérika xelq'ara dini erkinlik komitétining komissari, Uyghur kishilik hoquq qurulushining mudiriyet re'isi nuri türkel “Dunyadiki tesri küchlük 100 shexs” qataridin orun aldi.

Bu yilliq “Dunyadiki tesri küchlük 100 shexs” tizimlikide amérika prézidénti donald tramp, amérikadiki démokratlar partiyesining prézidént namzati jow baydin, teywen prézidénti sey yingwén we xitay dölet re'isi shi jinpingmu bar iken.

“Dewr” heptilik zhurnilining bash ijra'iye emeldari we bash muherriri édward félséntal “Dunyadiki tesri küchlük 100 shexs” tizimliki heqqide mundaq dep yazidu: “Bu yilqi tizimlik bizning alte ay ilgiri perez qilghinimizdin köp perqliq boldi. ‛dunyadiki tesri küchlük 100 shexs‚ tizimliki ezeldin dunyaning we bir-birimizning eyniki bolup kelgen. Bu yilqi tizimlikte her xil kishilerni köreleysiz. Dölet bashliqliri, köngüng ichish sahesidikiler, hetta héch tonulmighan shexslernimu uchiritisiz. Ular insan hayatini qutquzush, dunyaning her xil mesililirini hel qilishta pewqul'adde küch chiqarghan kishilerdur. Ular her birimizni imkaniyetimizning yétishiche, téximu adil, güzel tinch tereqqiy qilghan dunya berpa qilishqa tesir körsitishke ündeydu.”

“Dunyadiki tesri küchlük 100 shexs” ning biri bolup tallan'ghan nuri türkel ependi ziyaritimizni qobul qilip, mundaq dédi: “Bu xewerni anglighandiki héssiyatim nahayiti murekkep. Xelqimning azabliq, échinishliq hayatini ünümlük anglitip, ‛yüz tesiri zor shexs‚ ining biri boluptimen. Eger weténim tinch-aman bolghan bolsa, xelqim insaniy qedir-qimmiti bilen yashiyalighan bolsa, manga bu ataqning héch hajiti yoq idi.”

Dunya Uyghur qurultiyi nuri türkel ependini “Dewr” heptilik zhurnilining “Dunyadiki tesri küchlük 100 shexs” namzatliqigha körsetken bolup, dunya Uyghur qurultiyining re'isi dolqun eysa ependi bu heqte ziyarimizni qobul qilip, mundaq dédi: “Bu qétimliq tallinish peqet nuri türkel ependining yaki dunya Uyghur qurultiyining sheripi bolup qalmastin, belki Uyghur mesilisining, sherqi türkistan dawasining xelq'arada salahiyet qazinishida muhim ehmiyetke ige.”

“Dewr” heptilik zhurnili özining bash bétide “‛dunyadiki tesri küchlük 100 shexs‚ ni qandaq tallaymiz” serlewhelik maqaliside mundaq dep yazghan: “Bu tizimlikte dunya rehberliri we yerlik siyasiy pa'aliyetchiler, sen'etchiler we tenheriketchiler, alimlar, igilik tikligüchiler we hetta amérika prézidénti saylimigha qatnishiwatqan shexslermu bar. Ular her xil usulda dunyadiki kona qa'idilerni buzup tashlighanlar, yéngi rékordlarni yaratqanlar, qilghili bolmaydighan ishning yoqluqini bildürgenlerdur. Yeni ular izdigüchiler, özgirishtin we özgertishtin qorqmaydighanlardur.”

Nuri türkel ependi dunyagha tesir körsitiwatqan kishiler arisida hem ijabiy hem selbiy shexslerning barliqini tekitlidi. U selbiy tesir körsitiwatqan kishilerning tizimlikte bolushi dunyaning ularni étirap qilghanliqi bolmastin, belki insanlargha her ikki tereptin “Ders” bériwatqanliqini eskertti. U yene özining isimining tizimlikke kirishining emeliyette Uyghur mesilisining xelq'ara sewiyige kötürülgenlikidin dérek béridighanliqini eskertti.

U yene Uyghur teshkilatlirining we siyasiy pa'alyetchilirining bu tizimliktin öginishke tégishlik jaylirini we diqqet qilishqa tégishlik bir qanche nuqtilirini körsitip ötti. U mundaq dédi: “Siyasiy herikette oxshimighan pikir, oxshimighan meydan tutudighan ehwallar bolidu. Buning ichidin eng ünümlük, kesipleshken, toghra yolni tallash bek muhim. Mushu ‛dunyagha tesir körsetken yüz kishi‚ tizimlikidin qandaq yol bilen siyasiy heriket ilip barghanda dunyagha tesir körsetkili bolidighanliqi heqqide teshkilatlirimiz, pa'aliyetchilirimiz qayta oylinidu, dep qaraymen.”

“Dewr” heptilik zhurnili “‛dunyadiki tesri küchlük 100 shexs‚ ni qandaq tallaymiz” serlewhelik maqalisining axirida mundaq dep yazidu: “Tizimliktiki her yili tallap chiqilidighan bu kishilerning her biri dunyagha özige xas bir ders béridu. Bizning hemmisige qoshulushimizning hajiti yoq. Emma ular körsetken tesir bizni oylandurmay qalmaydu.”

“Dewr” heptilik zhurnili tunji qétim 1923-yili 3-mart nyu-york shehiride neshr qilin'ghan. 2004-Yilidin bashlap her yili shu yilliq “Dunyadiki tesri küchlük 100 shexs” ni bahalap chiqip, élan qilishqa bashlighan. Nuri türkel ependi bu tizimlikke kirgen tunji Uyghur bolup hési'ablinidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.