Хитай диний ишлар әмәлдари йе шаввен вашингтонни зиярәт қилди


2008.02.21

Хитай дөләтлик диний ишлар идарисиниң башлиқи йе шаввен вашингтонни зиярәт қилип, америкиға бейҗиң олимпик йиғини һарписида хитай диний әркинлик вәзийитини тәнқид қилидиған доклат яки баянатлар елан қилмаслиқ һәққидә нәсиһәт қилмақта. Йе шаввен вашингтонда америка әмәлдарлири билән сөһбәт өткүзди һәм җорҗитавн университитида сөз қилип, хитайниң диний әркинлик хатирисини ақлиди.

У чаршәнбә күни америка ярдәмчи ташқи ишлар министири паула добрейнский билән көрүшкәндин кейин мухбирларға баянат елан қилип, хитайниң тинч тәрәққияти диний етиқад вә кишилик һоқуққа һөрмәт қилишқа тайинидиғанлиқини илгири сүргән. У йәнә президент бушниң хәлқара диний әркинлик баш әлчиси җон ханфрид қатарлиқлар билән сөһбәт өткүзди.

Йе шаввен, америка ташқи ишлар министирлиқи 2007 ‏- йили елан қилған хитайниң диний мәзһәпләрни үзлүксиз бастуруватқанлиқи тәнқид қилинған диний әркинлик доклатини " асассиз" дәп әйиблигән хитай әмәлдарлириниң бири иди. У, җорҗитавн университетидики сөзидә ху җинтавниң йеқинда сөзлигән динниң роли һәққидики баяни"дуняға берилгән муһим бишарәт" дәйду. Лекин хитайниң диний әркинлик хатириси америка вә хәлқара кишилик һоқуқи тәшкилатлириниң үзлүксиз тәнқидигә учримақта. Болупму хитайниң уйғурларға қаратқан диний сиясити, уйғур яш өсмүрләрниң диний тәлим - тәрбийә елиш, намаз оқуш, роза тутуш һәм һәҗ қилишини чәкләш қатарлиқлар тәнқидкә учримақта иди.

Йе шаввен, америка дөләт мәҗлисиниң тибәт роһани даһиси далай ламаға шәрәп медали бериш вәқәсигә баһа берип, хитайниң олимпик билән алдирашлиқини, буниңға ғәзәплинишкә " вақти йоқлуқини" билдүрди. У, җорҗитавн университетида ватиканниң вашингтондики баш әлчиси билән сөһбәт өткүзди һәмдә хитай билән ватикан арисидики пикир ихтилапи азийиватқанлиқини билдүрди. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.