Xitay hökümiti kichik benchen lamaning tibette yighin échishini uyushturdi

Xitay hökümiti teripidin, 11‏-benchen lama unwanigha teyinlen'gen, 15 yashtiki giyanchiyan norbu tibet xelqining diniy erkinliktin behrimen boluwatqanliqini bayan qilip, xitay hökümitige sadiq bolidighanliqini bildürgen.

Xitay hökümiti, dalay lama teripidin benchen lama ornigha namzat qilip körsitilgen kichik balini ret qilip , giyanchiyan norbuni 6 yashtiki waqtida tibette dalay lamadin kéyin , ikkinchi chong diniy mertiwe hésablan'ghan benchen lama unwanigha teyinligen idi. Xewerlerge qarighanda, xitay hökümiti da'alay lama teripidin benchen lama ünwani bérilgen gidhum choki niyima ni1995‏-yilidin béri nazaret astida tutmaqta.

Shinxu'a agéntliqining xewer qilishiche, xitay hökümiti teripidin benchen lamaliqqa teyinlen'gen giyanchiyan norbu, xitay asasi qanunining himayiside diniy wezipilirini erkin- azade élip bériwatqanliqini bildürgen.

Xewerlerge qarighanda, bir nechche heptidin béri, benchen lamaning teyinlen'genlikining 10 yilliqini xati'irlewatqan xitay hökümiti, uninggha tibette nechche ming tibetlikning qatnishishi bilen bir diniy murasim ötküzüshige ruxset bergen.

Fransiye agéntliqining xewer qilishiche, xitay hökümiti giyanchiyan norbuning mertiwisini kötürüsh we kücheytish arqiliq, uningdin dalay lamagha qarshi paydilinishni pilanlimaqta iken. 1959‏-Yildin béri tibetni qattiq qolluq bilen bashqurup kéliwatqan xitay hökümiti, tibet xelqining diniy erkinlikini cheklep, xitay hökümitining syi'asitige tinchliq bilen naraziliq bildürgen nurghunlighan tibetlikni türmige tashlap , xitayning ichkiri ölkiliridin xitay küchmenlirini élip chiqip tibetke orunlashturmaqta. (Qanat)