Хитай һөкүмити кичик бәнчән ламаниң тибәттә йиғин ечишини уюштурди

Хитай һөкүмити тәрипидин, 11‏-бәнчән лама унваниға тәйинләнгән, 15 яштики гиянчиян норбу тибәт хәлқиниң диний әркинликтин бәһримән болуватқанлиқини баян қилип, хитай һөкүмитигә садиқ болидиғанлиқини билдүргән.

Хитай һөкүмити, далай лама тәрипидин бәнчән лама орниға намзат қилип көрситилгән кичик балини рәт қилип , гиянчиян норбуни 6 яштики вақтида тибәттә далай ламадин кейин , иккинчи чоң диний мәртивә һесабланған бәнчән лама унваниға тәйинлигән иди. Хәвәрләргә қариғанда, хитай һөкүмити даалай лама тәрипидин бәнчән лама үнвани берилгән гидһум чоки нийима ни1995‏-йилидин бери назарәт астида тутмақта.

Шинхуа агентлиқиниң хәвәр қилишичә, хитай һөкүмити тәрипидин бәнчән ламалиққа тәйинләнгән гиянчиян норбу, хитай асаси қануниниң һимайисидә диний вәзипилирини әркин- азадә елип бериватқанлиқини билдүргән.

Хәвәрләргә қариғанда, бир нәччә һәптидин бери, бәнчән ламаниң тәйинләнгәнликиниң 10 йиллиқини хатиирләватқан хитай һөкүмити, униңға тибәттә нәччә миң тибәтликниң қатнишиши билән бир диний мурасим өткүзүшигә рухсәт бәргән.

Франсийә агентлиқиниң хәвәр қилишичә, хитай һөкүмити гиянчиян норбуниң мәртивисини көтүрүш вә күчәйтиш арқилиқ, униңдин далай ламаға қарши пайдилинишни пиланлимақта икән. 1959‏-Йилдин бери тибәтни қаттиқ қоллуқ билән башқуруп келиватқан хитай һөкүмити, тибәт хәлқиниң диний әркинликини чәкләп, хитай һөкүмитиниң сйиаситигә тинчлиқ билән наразилиқ билдүргән нурғунлиған тибәтликни түрмигә ташлап , хитайниң ичкири өлкилиридин хитай күчмәнлирини елип чиқип тибәткә орунлаштурмақта. (Қанат)